رامپور: غیر قانونی اسلحہ فیکٹری چلانے کے الزام میں ایک گرفتار

ریاست اترپردیش کے رامپور ضلع کی سوار تحصیل میں پولیس نے ایک غیر قانونی اسلحہ فیکٹری پر چھاپہ ماری کا دعویٰ کیا ہے۔ ساتھ ہی جانکاری دیتے ہوئے بتایا کہ غیر قانونی اسلحہ فیکٹری چلاتے ملزم گرو دیو سنگھ کو موقع سے گرفتار کیا ہے اور اسلحہ فیکٹری سے بڑی مقدار میں تیار شدہ اور نصف تیار شدہ طمنچے بھی برآمد کئے ہیں۔

رامپور کے اے ایس پی ارون کمار سنگھ نے بتایا کہ، 'پولیس کے ذریعہ جرم اور جرائم پیشہ افراد کے خلاف چلائی جارہی مہم کے دوران آج رامپور کے سوار تحصیل میں پولیس نے اطلاعات کی بنیاد پر گرو دیو سنگھ ولد کیہر سنگھ کو گرفتار کیا ہے۔'

انہوں نے بتایا کہ، 'گرفتار ملزم جنگل گرام بھونت نگر میں چنہ رام کے آم، امرود کے باغ میں غیر قانونی طور پر اسلحہ فیکٹری میں اسلحہ تیار کر رہا تھا۔

موقع سے دو عدد دیسی طمنچے 12 بور، 2 عدد ناجائز طمنچے 315، ایک دیسی روالور 32 بور (خراب حالت میں)، زندہ کھوکھے کارتوس اور اسلحہ بنانے کے اوزار برآمد ہوئے ہیں۔ ملزم گرو دیو سنگھ کے خلاف مقدمہ 493/20 دفعہ 5/25 آرمز ایکٹ کے تحت کارروائی کی جا رہی ہے۔'