بارہ بنکی: پولیس نے بائیک چور گروہ کا پردہ فاش کیا

ریاست اتر پردیش کے ضلع بارہ بنکی میں پولیس نے ہفتہ کے روز بائیک چور گروہ کا پردہ فاش کیا ہے۔ پولیس نے گروہ کے دو اراکین کو گرفتار کئے ہیں اور ان کے قبضے سے تین موٹر سائیکل، چھ موبائل، طمنچہ، چاقو اور چوری میں استعمال کئے جانے والے اوزار برآمد کئے ہیں۔ دونوں ملزمان ایودھیا ضلع کے رہنے والے ہیں۔

بارہ بنکی کے اے ایس پی ساؤتھ منوج کمار پانڈے نے بتایا کہ کوٹھی تھانہ حلقے کی پولیس نے ہفتہ کو مخبر سے ملی اطلاع کی بنیاد پر میراپور گاؤں سے ایودھیا ضلع کے ارون کمار اور ہرکیش کو گرفتار کیا۔

گرفتاری کے بعد خلاصہ ہوا کہ یہ دونوں شاطر چور ہیں۔ ان میں سے ارون پر بارہ بنکی، رائے بریلی اور ایودھیا ضلع میں ایک درجن مقدمے درج ہیں اور اس پر گینگسٹر ایکٹ بھی نافذ ہے، جبکہ ہرکیش پر رائے ریلی اور بارہ بنکی میں ایک ایک مقدمہ درج ہے۔

پولیس نے بتایا کہ یہ دونوں پہلے سنسان علاقوں میں ریکی کرتے ہیں، اس کے بعد باہر کھڑی گاڑیوں کو چرا لے جاتے ہیں۔ اس کے ساتھ راہگیروں سے کسی بہانے موبائل لیکر فرار ہو جایا کرتے ہیں۔ اس کے علاوہ گھروں سے بھی یہ چوری کیا کرتے ہیں۔