پولیس کا نوجوان پر تشدد، ایس پی نے کیا لائن حاضر

ایک طرف عوام اس کورونا وائرس کے مشکل وقت میں پولیس کی کارکردگی پر پھولوں کی بارش کر رہی ہے وہیں دوسری جانب کچھ پولیس کے جوان عوام پر لاٹھیاں برسا رہے ہیں۔

ریاست اترپردیش کے ضع بہرائچ میں ایک مسلمان کسان کو کھیت جانا مہنگا پڑا۔ واپسی پر دو پولیس اہلکار نے اس کسان پر لاٹھی کی بارش کر دی۔

پولیس کی پٹائی کو دیکھ کر مقامی افراد کو آتا دیکھ دونوں پولیس اہلکار بھاگ نکلے۔ یہ واقعہ تھانہ بونڈی کے علاقے کندوساپوروا کا ہے جہاں جسیم انصاری ولد شمیم ​​انصاری اپنے گاؤں کے باہر کھیت سے واپس آرہا تھا، کہ سامنے سے آرہے بونڈی پولیس اسٹیشن کے دو جوانوں نے جسیم کو روکا، اور اس کا نام پوچھا، جیسے ہی اس نے اپنا نام بتایا اس کے فوراً بعد دونوں پولیس والے جسیم پر ٹوٹ پڑے، اور اسے مار مار کر ادھ مرا بنا دیا۔

تبھی گاؤں کے لوگوں کی نگاہ جسیم پر پڑی اور جسیم کو بچانے کے لیے دوڑے، جسے دیکھ پولیس کانسٹیبل ارون کمار سنگھ اپنے ہمراہ ایک اور سپاہی دونوں موقع سے فرار ہوگئے۔

اطلاع ملنے پر موقع پر پہنچے پولیس افسر برہمانند سنگھ نے بتایا کہ زخمی جسیم کو لے کر اہل خانہ ڈاکٹر کے پاس گئے۔ انہوں نے ملزم کے خلاف کاروائی کی بات کہی۔

اس معاملے کا جائزہ لیتے ہوئے بہرائچ کے پولیس کپتان ڈاکٹر وپن کمار مشرا نے دونوں پولیس اہلکار کو فوراً لائن حاضر کر دیا ہے۔