اے ایم یو کے میڈیکل کالج میں پلازمہ تھیراپی کی شروعات

علی گڑھ مسلم یونیورسٹی (اے ایم یو) کا جواہر لعل نہرو میڈیکل کالج و اسپتال (جے این ایم سی ایچ) میں 29 لاکھ روپے کی لاگت سے پلازمہ ایفیریس مشین کے ذریعے کووڈ 19 کے مریضوں کا علاج کرنے کے لیے پلازمہ تھیراپی کی شروعات کی گئی ہے۔

عالمی سطح پر کی گئی تحقیق میں یہ پایا گیا ہے کہ کووڈ 19 سے جو مریض صحتیاب ہوگئے ہیں ان کا پلازمہ دیگر معاون طریقہ ہائے علاج کے ساتھ کووڈ 19 کے مریضوں کے لئے بہت کارگر ہے۔ پلازمہ عطیہ کرنے والے رضا کار کو صحت مند ہونا چاہیے، عمر 17 سال سے زیادہ ہونی چاہیے اور وزن اور قد کی مناسبت سے بدن میں خاطرخواہ خون موجود ہونا چاہیے۔

اے ایم یو کے وائس چانسلر نے کہا کہ جواہر لعل نہرو میڈیکل کالج و اسپتال میں صحت عملہ دن رات کام کر رہا ہے اور متاثرہ مریضوں کا تندہی کے ساتھ علاج کیا جا رہا ہے۔ اس کے مریضوں کی طبی نگہداشت کے لیے ایل 2 اسپتال قرار دیا ہے۔ جہاں مفت کورونا نمونوں کی جانچ ہو رہی ہے۔جواہر لعل نہرو میڈیکل کالج کے پرنسپل پروفیسر شاہد علی صدیقی نے بتایا ہمارے یہاں جو کووڈ وارڈ بنا ہوا ہے اس میں ہم نے وائس چانسلر کی قیادت میں پلازمہ تھیراپی شروع کرنے کا فیصلہ کیا ہے ۔ابھی تک ایک مریض کا علاج پلازمہ تھیراپی سے کیا جاچکا ہے۔جو مریض کورونا سے صحتیاب ہو چکے ہیں ان کے خون میں اینٹی باڈی ہوتی ہیں، جسے مریض میں منتقل کردیا جاتا ہے اور اس سے کووڈ سے لڑنے کی قوت میں اضافہ ہوجاتا ہے، مریض کو جلد صحتیاب ہونے میں مدد ملتی ہے۔پروفیسر شاہد علی نے مزید بتایا کہ ابھی تک چار لوگوں نے پلازمہ عطیہ کیا ہے، میں عوام سے اپیل کرنا چاہوں گا جو لوگ کووڈ سے صحتیاب ہو چکے ہیں وہ آکر ہمارے یہاں جانچ کروائیں۔ اگر ان کے پلازمہ میں اینٹی باڈی ہے تو وہ عطیہ کریں کیونکہ ہم یہاں ایک پلازمہ بینک بنانے جا رہے ہیں تاکہ کسی مریض کو ضرورت ہو تو انتظار نہ کرنا پڑے۔