ریاست اترپردیش کے شہر بارہ بنکی میں کانگریس رکن پارلیمان اور قومی ترجمان پی ایل پنیا نے جوڈیشیل رفارم کی وکالت کرتے ہوئے واضح طور پر کہا کہ الیکشن رفارم سے زیادہ ضروری ملک کے عدالتی نظام کو درست کرنا ہے۔
جوڈیشل رفارم وقت کی اہم ضرورت بارہ بنکی میں اپنی رہائیش پر نامہ نگاروں سے گفتگو کے دوران انہوں نے ایک سوال کے جواب میں کہا کہ نربھیا سانحہ کو پیش آئے ہوئے سات برس گزر گئے، لیکن یہ ابھی بھی عدالت عظمیٰ میں زیر التوا ہے۔
انہوں نے بتایا کہ اس کیس کی سماعت ذیلی عدالتوں میں جلدی ہوئی اور ہائی کورٹ کا فیصلہ فیصلہ بھی جلدی آ گیا، لیکن گزشتہ پانچ برسوں سے یہ کیس سپریم کورٹ میں زیر سماعت ہے۔
انہوں نے مطالبہ کیا کہ مقدموں کے فیصلوں کے لیے ایک وقت مقرر ہونا چاہئے، اور ایسا محض خواتین کے استحصال میں ہی نہیں بلکہ تمام قسم کے کیسز کے لیے ہونا چاہیے۔
انہوں نے مزید کہا کہ ملک میں ججز کی تعداد بہت کم ہے، جس کو بڑھانے کے لیے تمام سطح پر رفارم اور توازن بنانے کی ضرورت ہے۔
