لکھنؤ: بازار تو کھلے لیکن پبلک ٹرانسپورٹ کو اجازت نہیں

لکھنؤ میں جمعرات کو کچھ شرطوں کے ساتھ بازار تو کھلے لیکن بس،آٹو اور دیگر پبلک ٹرانسپورٹ کو سڑکوں سے دور ہی رکھا گیا۔

لکھنؤ: اترپردیش کی راجدھانی لکھنؤ میں جمعرات کو کچھ شرطوں کے ساتھ بازار تو کھلے لیکن بس،آٹو اور دیگر پبلک ٹرانسپورٹ کو سڑکوں سے دور ہی رکھا گیا۔

لکھنؤ ضلع انتظامیہ نے پہلے آٹو کو ڈرائیور کے علاوہ 2سواریوں کے ساتھ چلنے کی اجازت دی تھی لیکن بعد میں اسے واپس لے لیا۔ اسی طرح سے ای رکشا بھی اب سڑک پر نہیں اترسکیں گے۔

لکھنؤ ریڈ زون میں ہے اس لئے ڈسٹرکٹ مجسٹریٹ ابھیشیک پرکاش نے بازار کھولنے کے لئے تاجروں سے بات کی۔ تاجروں نے تقریبا دو مہینے سے بند ان کی دوکانوں کی وجہ سے ان کو درپیش مسائل کے بارے میں بتایا۔

ضلع انتظامیہ اور پولیس نے پورے معاملے کا جائزہ لینے کے بعد لکھنؤ کے سب سے خاص بازار امین آباد اور چوک کے بازار کو نہ کھولنے کا فیصلہ کیا۔ اس کے علاوہ عالم باغ، قیصر باغ اور نشاط گنج کے بازار بھی بندرہیں گے۔ ڈسٹرکٹ مجسٹریٹ نے بتایا کہ جہاں بازار کھولنے کی اجازت دی گئی ہے وہاں دوکانیں صبح سات سے شام سات بجے تک ہی کھلیں گی۔

گائڈ لائن کے مطابق دوکانداروں اور خریداری کرنے والوں کے لئے ماسک لگانے کے ساتھ فون میں آروگیہ سیتو ایپ کا ہونا لازمی ہوگا۔ اس کے علاوہ سماجی فاصلہ کا پورا خیال کرنا ہوگا ان جگہوں پر دوکانیں کھولنے کی اجازت دی گئی ہے جہاں آس پاس کوئی کنٹونمنٹ یا بفر زون نہیں ہے۔ بازار کے علاوہ ریسٹورینٹ بھی کھلیں گے لیکن وہاں صرف ہوم ڈلیوری کی سہولیت ہوگی۔

ضلع انتظامیہ نے سخت ہدایت دی ہے کہ بغیر ماسک کے خریداری کرنے آنے والے خریداروں کو کوئی دوکاندار سامان نہ دے اور ان کی رپورٹ پولیس میں درج کرائے۔