ریاست اترپردیش کے مرادآباد تھانہ کندرکی علاقے کے گاؤں جیتیا فیروز پور کے مقامی لوگ اپنی جان خطرے میں ڈال کر ندی پار کرتے ہوئے شہر پہنچتے ہیں۔
جیتیا فیروز پور گاؤں کے عوام کافی لمبے عرصہ سے بنی ندی پر پل تعمیر کرنے کا مطالبہ کررہے ہیں لیکن آج تک حکومت کی جانب سے اس سلسلہ میں کوئی توجہ نہیں دی گئی۔
ندی پر پل نہ ہونے کی وجہ سے مقامی لوگوں کو ندی پار کرنے کے لیے گاڑیوں کے ٹیوب کا سہارا لینا پڑتا ہے تاہم ندی کو پار کرنے کے لیے گاؤں والوں نے خود ہی ایک لکڑی کا عارضی پل بنایا تھا جو مسلسل بارش کی وجہ سے پانی میں ڈوب گیا۔
ای ٹی وی بھارت نے کچھ روز قبل ہی اس سلسلہ میں تفصیلی خبر شائع کی تھی جس کے بعد اعلیٰ عہدیداروں نے یہاں کا معائنہ کیا تھا لیکن ابھی تک پل کی تعمیر کے سلسلہ میں کچھ بھی نہیں کیا گیا، جس کی وجہ سے یہاں کے لوگ مایوس ہیں۔
