جونپور: تہواروں کے مدنظر پیس کمیٹی میٹنگ کا انعقاد

ضلع مجسٹریٹ منیش کمار ورما نے کہا کہ تمام لوگ اپنے اپنے تہوار کو آپسی اتحاد و اتفاق کے ساتھ منائیں اور عید الضحٰی کے موقع پر اپنے آس پاس صاف صفائی کا اہتمام کریں۔

اتر پردیش کے ضلع جونپور میں مذہبی تہواروں کے مد نظر ضلع مجسٹریٹ منیش کمار ورما کی صدارت میں پیس کمیٹی کی میٹنگ کا انعقاد کیا گیا، جس میں تمام ممبران سمیت ضلع انتظامیہ کے تمام شعبے کے افسران نے بھی شرکت کی اور اپنے اپنے مفید مشوروں سے نوازا۔

اس موقع پر میٹنگ کو خطاب کرتے ہوئے ضلع مجسٹریٹ منیش کمار ورما نے کہا کہ تمام لوگ اپنے اپنے تہوار کو آپسی اتحاد و اتفاق کے ساتھ منائیں اور عید الضحٰی کے موقع پر اپنے آس پاس صاف صفائی کا اہتمام کریں۔

ای ٹی وی بھارت سے گفتگو کرتے ہوئے پیس کمیٹی کے ممبر و سماجی کارکن انوار الحق گڈو نے بتایا کہ میٹنگ میں ممنوعہ جانوروں کی قربانی کرنے سے احتراز برتنے کی بات کی گئی ہے۔

انہوں نے کہا کہ ویسے بھی ہمارے شہر میں ممنوعہ جانوروں کی قربانی نہیں کی جاتی ہے صرف بکرا، پڑوا کی ہی قربانی کی جائے گی۔

انوار الحق گڈو نے عید الاضحٰی کی نماز کے تعلق سے بتایا کہ ضلع مجسٹریٹ کا کہنا ہے کہ کورونا گائیڈ لائن پر عمل کرتے ہوئے عیدگاہ میں نماز کرنے کی اجازت نہیں ہے۔

انہوں نے کہا کہ تجربہ کاروں کے ذریعے کورونا وبا کی تیسری لہر آنے کی بات کہی جا رہی ہے۔ اس لئے ہم تمام کی یہ ذمہ داری بنتی ہے کہ کورونا گائیڈ لائن پر عمل کریں تاکہ ہماری وجہ سے کسی کو تکلیف نہ پہونچے اور انتظامیہ کی جانب سے جاری گائیڈ لائن پر عمل کریں۔

انوار الحق گڈو نے شہر کی عوام سے اپیل کرتے ہوئے کہا کہ قربانی شدہ جانوروں کے فضلات وغیرہ کو کھلی جگہ نہ پھینکے بلکہ بلدیہ کی جانب سے رکھے ہوئے کنٹینر و ڈبہ میں ہی ڈالیں کیونکہ ضلع مجسٹریٹ نے بلدیہ کو اس کا سختی سے عمل کرنے کا حکم دیا ہے۔