ویکسینیشن کو لے کر ملازمین میں بے چینی

کورونا ویکسینیشن کے معاملے پر محکمہ صحت کے ملازمین میں بے چینی پائی جارہی ہے، حالانکہ محکمہ صحت کے ملازمین کو ہی پہلے ٹیکہ لگوانا ہے جن کی تعداد ساڑھے سات ہزار بتائی جاتی ہے۔

ریاست اترپردیش کے رامپور میں کورونا سے تحفظ کے لئے ٹیکے لگوانے کو لے کر سرکاری ملازمین میں گھبراہٹ دیکھی جارہی ہے، ویکسینیشن کے تینوں مرحلوں میں محکمہ صحت کے ملازمین کو اب تک 50 فیصد سے بھی کم ٹیکے لگائے گئے ہیں۔

پہلے مرحلے میں 16 جنوری کو 600 ملازمین کے ٹیکے لگائے جانے کا ہدف مقرر کیا گیا تھا لیکن 215 ملازمین نے ہی ٹیکے لگوائے۔ دوسرا مرحلہ 23 جنوری کو بارہ سو ویکسینیشن کا ہدف رکھا گیا تھا، جبکہ 537 ملازمین نے ہی ٹیکے لگوائے، وہیں گذشتہ روز تیسرے مرحلے میں 2071 لوگوں کو کورونا کے ٹیکے لگوانے تھے لیکن 1676 لوگوں نے ہی ٹیکے لگوائے۔

گذشتہ روز بھی کووڈ۔19 ٹیکاکاری سینٹرز پر 1337 خواتین نے ٹیکے لگوائے جبکہ 339 مردوں کے ٹیکے لگائے گئے۔ محکمہ صحت کے ملازمین کو ہی سب سے پہلے ٹیکہ لگوانا ہے جن کی تعداد ساڑھے سات ہزار بتائی جاتی ہے۔

محکمہ صحت کے مرد ملازمین میں ٹیکہ لگنے کا خوف طاری ہے، تاہم تینوں مرحلوں میں ٹیکاکاری کے بعد کوئی ایسی اطلاعات نہیں آئی ہے کہ اس سے کسی طرح کی پریشانیوں کا سامنا ہو۔