Padma Award to Eight UP Personalities ملائم سمیت یوپی کی آٹھ شخصیات کو پدم اعزاز

یوم جمہوریہ کے موقع پر مرکزی حکومت نے ملائم سنگھ یادو کو بعد از مرگ پدم وبھوشن سے نوازنے کا اعلان کیا ہے۔

لکھنؤ: سابق وزیر اعلیٰ، سابق وزیر دفاع اور سماج وادی پارٹی (ایس پی) کے بانی آنجہانی ملائم سنگھ یادو سمیت اتر پردیش کی آٹھ شخصیات کو ملک کے اعلیٰ شہری اعزاز 'پدم ایوارڈ' سے نوازا گیا ہے۔ یوم جمہوریہ کے موقع پر مرکزی حکومت نے ملائم سنگھ یادو کو بعد از مرگ پدم وبھوشن سے نوازنے کا اعلان کیا ہے، جب کہ رادھاچرن گپتا کو ادب اور تعلیم کے لئے، دلشاد حسین کو فن کے شعبے میں، اروند کمار کو سائنس اور انجینئرنگ، اوما شنکر پانڈے کو سماجی کاموں کے لیے، منورنجن ساہو کو میڈیسن کے شعبے کے لیے، رتوک سانیال کو فن کے شعبے کے لیےاور وشوناتھ پرساد تیواری کو ادب اور تعلیم کے لیے پدم شری سے نوازا جائے گا۔

خوشی کا اظہار کرتے ہوئے وزیر اعلی یوگی آدتیہ ناتھ نے ٹویٹ کیا 'آج باوقار ’پدم ایوارڈ' سے نوازے جانے والی اترپردیش کی تمام آٹھ شخصیات کو دلی مبارکباد۔ مختلف شعبوں میں آپ کی شاندار خدمات نے قومی اور بین الاقوامی سطح پر ریاست کا سر فخر سے بلند کیا ہے۔ مقصد کے لیے آپ کی لگن مثالی ہے۔'

واضح رہے کہ صدر جمہوریہ نے سال 2023 کے لیے 106 پدم ایوارڈز کی فہرست کو منظوری دے دی ہے۔ اس فہرست میں 6 پدم وبھوشن، 9 پدم بھوشن اور 91 پدم شری شامل ہیں۔ اس بار 19 ایوارڈ یافتہ خواتین ہیں اور اس فہرست میں غیر ملکی کے زمرے سے 2 افراد اور 7 بعد از مرگ ایوارڈ یافتہ بھی شامل ہیں۔ 74ویں یوم جمہوریہ کے موقع پر پدم ایوارڈ حاصل کرنے والے مشہور شخصیات کے ناموں کا اعلان کر دیا گیا ہے۔ آنجہانی ایس پی سرپرست ملائم سنگھ یادو، موسیقار ذاکر حسین، آنجہانی دلیپ مہلانوبس ایس ایم کرشنا، سری نواس وردھن اور آنجہانی بالکرشن دوشی کو پدم وبھوشن سے نوازا جائے گا۔

یو این آئی