غازی پور: تبلیغی مرکز سے آنے والے ایک شخص کی رپورٹ مثبت

ریاست اترپردیش کے ضلع غازی پور میں دہلی کے حضرت نظام الدین تبلیغی مرکز سے آنے والے 11 افراد میں سے ایک شخص کی کورونا ٹیسٹ رپورٹ مثبت آئی ہے۔

ریاست اترپردیش کے ضلع غازی پور صدر علاقے کے مہوا باغ میں واقع مسجد میں کل 11 افراد ملے۔ ان کی نشاندہی کے بعد ضلع انتظامیہ نے مسجد میں ہی سب کو کورنٹائن میں رکھ دیا۔ کل تحقیق کے لیے سبھی کے خون کا نمونہ لیا گیا اور جانچ کے لیے وارانسی بھیج دیا گیا۔ آج جب جانچ کی رپورٹ آئی تو ایک شخص کی کورونا ٹیسٹ رپورٹ مثبت آئی ہے۔

اس کی رپورٹ آتے ہی ضلع انتظامیہ میں ہلچل مچ گئی۔ انتظامیہ اور محکمہ صحت کی ٹیم فورا مسجد پہنچی اور کورونا مثبت شخص کو ضلع ہسپتال لایا گیا۔

مہوا باغ علاقے میں سکیورٹی سخت کر دی گئی ہے۔ تمام افراد کا بھی خون کا نمونہ لے کر جانچ کے لیے بی ایچ یو بھیجنے کی تیاری کی جا رہی ہے۔ غازی پور میں اب تک کوئی بھی کورونا پوزیٹیو نہیں تھا۔

غازی پور میں حضرت نظام الدین تبلیغی مرکز سے آئے 11 افراد میں سے ایک کو کورونا پوزیٹو آنے سے غازی پور میں یہ پہلا معاملہ ہے۔

اس سے پورے علاقے میں سنسنی پھیل گئی ہے۔ کورونا پوزیٹیو مریض کو ہسپتال میں داخل کرنے کے لیے قوائد شروع کر دی گئی ہے۔ ان 11 افراد میں سے 6 کو بخار ہے۔

ایک کیس سامنے آنے کے بعد اب غازی پور ضلع انتظامیہ ہائی الرٹ پر ہے۔ ضلع انتظامیہ اس معاملے میں کچھ بھی بولنے سے بچتا نظر آرہا ہے۔