شرابیوں نے نشے میں اپنے ساتھی کو ہلاک کردیا

لاک ڈاؤن کے دوران شراب کی دکان کھلنے کے سنگین نتائج سامنے آرہے ہیں ریاست اتر پردیش کے ضلع بنارس کے شیو پور علاقہ میں ایک شخص کو اینٹ سے مار کر بہیمانہ طریقے سے قتل کرنے کا سنسنی خیز معاملہ سامنے آیا ہے۔

بنارس کے شیو پور میں ہلاک ہونے والے شخص کا نام منیش سونکر ہے۔ شراب پینے کے دوران اس کے ساتھیوں کے ساتھ معمولی سی بات پر تنازع ہوا جس کے نتیجے میں نشے میں دھت دو نوجوانوں نے سونکر کو قتل کردیا۔

بتایا جارہا ہے کہ تھانہ شیو پور علاقے میں کھانے کے ڈھابہ کے قریب تین افراد شراب نوشی کر رہے تھے اسی دوران ان تینوں کے درمیان تنازعہ ہوا جس کے بعد منیش سونکر نامی 25 سالہ شخص کے چہرے پر اس کے ساتھیوں نے اینٹ سے مار کر بہیمانہ طریقے سے قتل کردیا۔

مقامی افراد اسے زونل ہسپتال کبیر چورا لائے، جہاں ڈاکٹروں نے اسے مردہ قرار دے دیا ہے۔ واقعے کی اطلاع ملنے پر تھانہ شیو پور کی پولیس اور سی او کینٹ محمد مشتاق اور ایس پی سٹی دنیش سنگھ موقع واردات پر پہنچ گئے۔

فی الحال پولیس نے ایک ملزم کو گرفتار کرلیا ہے جبکہ دوسرا ملزم فرار ہے۔ کرائم برانچ کی ٹیم بھی موقع پر پہنچ چکی ہے اور تفتیشی کارروائی شروع ہوگئی ہے۔