Sir Syed Day 2022 سر سید کا 205ویں یوم پیدائش پر قرآن خوانی اور چادر پوشی کا اہتمام

بانی درسگاہ سرسید احمد خان کے 205ویں یوم پیدائش کا آغاز حسب روایت یونیورسٹی کی تاریخی جامع مسجد میں قرآن خوانی کے بعد سر سید کے مزار پر چادر اور گل پوشی سے کیا گیا، وائس چانسلر نے علیگ برادری کو مبارکباد پیش کی۔ 205th birth anniversary of Sir Syed

محسن برصغیر اور علیگڑھ مسلم یونیورسٹی (اے ایم یو) کے بانی سر سید احمد خان کی پیدائش آج سے 205 برس قبل یعنی 17 اکتوبر 1817 کو دہلی میں ہوئی اور آپ کی وفات 27 مارچ 1898 کو علیگڑھ میں ہوئی اور آپ کی تدفین بھی اے ایم یو کی تاریخی جامع مسجد میں ہوئی۔ 205th birth anniversary of Sir Syed

آج سر سید احمد خاں کے 205ویں یوم پیدائش کے موقع پر روایت کے مطابق علی گڑھ مسلم یونیورسٹی کی تاریخی جامع مسجد میں فجر کی نماز کے بعد قرآن خوانی اور سر سید کے مزار پر چادر و گل پوشی کا اہتمام کیا گیا، جس میں وائس چانسلر سمیت یونیورسٹی کے طلبہ، ابنائے قدیم، انتظامیہ کے اعلی عہدیداران اور تدریسی و غیر تدریسی عملہ شامل رہے، وائس چانسلر پروفیسر طارق منصور نے سر سید احمد خان کا یوم پیدائش کے موقع پر خوشی کا اظہار کرتے ہوئے سبھی کو مبارک باد پیش کی۔ وائس چانسلر نے کہا کہ جشن یوم سرسید پوری دنیا میں منایا جاتا ہے جہاں بھی علیگ رہتے ہیں، وہاں یوم سر سید کے موقع پر مختلف پروگرامز کا اہتمام کرتے ہیں، جس میں مشاعرے، تقریر اور خصوصی عشائیہ وغیرہ کا اہتمام کیا جاتا ہے۔

اس موقع پر وائس چانسلر نے تمام علیگ برادری اور صحافیوں کو مبارکباد پیش کرتے ہوئے کہا سرسید کے پیغامات تعلیم، بھائی چارے، امن کو آگے لے جانا چاہیے۔ پروفیسر سعود عالم قاسمی (ڈین، دینیات فیکلٹی) نے سر سید کا یوم پیدائش پر خوشی کا اظہار کیا اور مبارکباد پیش کرتے ہوئے کہا سرسید احمد خاں نے جس تعلیم کی شمع علی گڑھ میں روشن کی تھی، اس کی روشنی آج بھارت سمیت پوری دنیا کو منور کر رہی ہے۔ سر سید کا کہنا تھا کہ تعلیم سستی اور آسان ہو اور ہر کسی کو تعلیم اسانی سے مل سکے۔

سرسید احمد خاں نے 1875 میں چھ بچوں کے ساتھ مدرسۃ العلوم شروع کیا، 8 جنوری 1877 کو محمڈن اینگلو اورینٹل (ایم اے او) کالج کی بنیاد رکھی گئی جس کے بعد 1920 میں ایم اے او کالج، علی گڑھ مسلم یونیورسٹی کے نام سے دنیا بھر میں معروف و مشہور ہوگیا، اور آج علی گڑھ مسلم یونیورسٹی میں تقریباً 30 ہزار طلبہ تعلیم حاصل کر رہے ہیں اور 100 سے زیادہ ممالک میں اے ایم یو کے طلبہ سر سید کا نام روشن کر رہے ہیں۔