بارہ بنکی: مسجد انہدام معاملے میں مخالف پارٹیوں کو نوٹس جاری

الہٰ آباد ہائی کورٹ نے بارہ بنکی مسجد انہدام کیس میں مخالف پارٹیوں کو نوٹس جاری کرکے تین ہفتوں میں جواب داخل کرنے کا حکم دیا ہے۔

اترپردیش کے ضلع بارہ بنکی مسجد انہدام کیس میں الہٰ آباد ہائی کورٹ نے کہا کہ 'پٹیشنر کی جانب سے پیش کی گئی تمام باتیں خاص طور پر جس طرح سے مسجد کو منہدم کیا گیا اور افسران کی طرف سے خلاف ورزی کی گئی، ان باتوں کو مد نظر رکھتے ہوئے کورٹ نے مخالف پارٹیوں کو نوٹس جاری کرکے تین ہفتوں میں جواب داخل کرنے کا حکم دیا ہے۔

الہٰ آباد ہائی کورٹ نے اتر پردیش حکومت کو ہدایت دیتے ہوئے کہا تھا کہ 'ریاست میں 2011 کے بعد تعمیر کردہ غیر قانونی مذہبی مقامات کو فوری طور پر ہٹا دیا جائے اور 2011 کے پہلے کی تعمیرات کو منتظمین کسی دوسری جگہ پر منتقل کر کے تعمیر کرائے۔

اسی کا فائدہ اٹھاتے ہوئے بارہ بنکی ضلع انتظامیہ کی جانب سے تحصیل رام سنیہی گھاٹ کے احاطے میں واقع قدیم مسجد کو منہدم کردیا گیا اور اس کا ملبہ مختلف دریاؤں میں بہادیا گیا۔

وقف بورڈ کی طرف سے سینیئر ایڈوکیٹ جے دیپ ماتھر نے بحث کرتے ہوئے عدالت کو بتایا تھا کہ 'یہ سو سالہ قدیم مسجد ہے اور آج بھی سرکاری ریکارڈ میں زمین آبادی میں درج ہے۔ ان کا کہنا تھا کہ 'ایس ڈی ایم نے دفعہ 133 کے تحت کارروائی کرتے ہوئے مسجد منہدم کرادیا جو کہ پوری طرح غلط ہے۔'

وہیں آل انڈیا مسلم پرسنل لا بورڈ کی طرف سے ایڈوکیٹ یوسف مچھالا نے بحث کی تھی، جس پر جسٹس راجن رائے اور جسٹس لوانیہ نے دونوں درخواست کی سماعت کرتے ہوئے اپنا فیصلہ محفوظ رکھ لیا تھا۔

کورٹ نے کہا کہ 'اس وقت کے ایس ڈی ایم دیوانشو پٹیل اور ریاستی عہدیداروں کو نوٹس جاری کیا گیا ہے۔ سنی سینٹرل وقف بورڈ اور آل انڈیا مسلم پرسنل لا بورڈ کے دلائل کو درج کیا گیا ہے۔'

ایڈوکیٹ سعود رئیس نے کہا کہ 'پرسنل لا بورڈ کی جانب سے بہت ہی مضبوط پٹیشن تیار کرکے تمام حقائق اور ثبوتوں کے ساتھ کورٹ میں پیش کیا گیا ہے۔ انہوں نے بتایا کہ 'کورٹ نے ہم لوگوں کی باتوں کو بہت ہی سنجیدگی سے سنا۔ اور ہمیں پوری امید ہے کہ ہم لوگوں کو جلد ہی انصاف ملے گا۔

قابل ذکر ہے کہ بارہ بنکی مسجد انتظامیہ کے حشمت علی و نعیم احمد اور آل انڈیا مسلم پرسنل لا بورڈ نے غریب نواز مسجد منہدم معاملے میں الہٰ آباد ہائی کورٹ میں ایڈووکیٹ سعود رئیس کے ذریعے رٹ پٹیشن داخل کی ہے۔ اس پٹیشن پر مسلم پرسنل لا بورڈ کی لیگل کمیٹی کے چیئرمین یوسف مچھالہ بحث کر رہے ہیں۔

اس کے ساتھ ہی یوپی سنی سینٹرل وقف بورڈ کی جانب سے بھی ایڈووکیٹ سید آفتاب احمد کے ذریعے پٹیشن داخل کی گئی ہے، جس پر سینیئر ایڈووکیٹ جے دیپ ماتھر نے بحث کی۔ ان دونوں پٹیشن میں اس بات پر زور دیا گیا ہے کہ مقامی افسران کے ذریعے انہدام کی کارروائی مکمل طور پر غیر آئینی اور غیر قانونی ہے۔