کورونا کی خطرناک صورت حال: لاشیں جلانیں کے لیے جگہ تک میسر نہیں

اترپردیش کے دارالحکومت لکھنؤ میں کورونا وائرس خطرناک صورت حال اختیار کرتا جا رہا ہے۔ حالت یہ ہے کہ گھاٹوں پر لاشیں جلانیں کے لیے جگہ تک نہیں مل رہی ہے۔ یہاں جگہ نہیں ملنے سے ایک کنبے کو لاش کی آخری رسومات کی ادائیگی چبوترے پر ہی کرنی پڑی۔

دارالحکومت لکھنؤ کے بھینسا کنڈ اور گلال گھاٹ کی حالت تشویشناک ہوتی جا رہی ہے۔ لکھنؤ میں نگر نگم اور ضلع انتظامیہ بھلے ہی بڑی تعداد میں پلیٹ فارم بنائے جانے کی بات کہہ رہی ہے، لیکن یہاں لوگوں کو لاش جلانے کے لیے جگہ تک نہیں مل رہی ہے۔

جمعرات کے روز جب لاش کی آخری رسومات ادا کرنے کے لئے گھاٹ پہنچے ایک کنبےکو جگہ نہیں ملی تو انہوں نے گھاٹ پر بیٹھنے کے لیے بنے ٹن شیڈ کے نیچے ہی لاش جلا دی۔ جس سے لاش کے ساتھ پورا ٹن شیڈ بھی جل کر خاکستر ہوگیا۔ حالات اس قدر ابتر ہیں کہ گھاٹوں پر لاش جلانے کے لیے گھنٹوں انتظار کرنا پڑ رہا ہے۔

لکھنؤ کے سٹی کمشنر اجے دویدی نے دیر رات لکھنؤ کے بھینسا کنڈ و گلال گھاٹ پر 108 لاشوں کے پہنچنے کی تصدیق کی تھی۔ لکھنؤ کے سٹی کمشنر اجے دویدی نے بتایا کہ 67 لاشوں کی آخری رسومات بھینسا کنڈ میں کیا جا رہا ہے، جبکہ 41 لاشوں کی آخری رسومات گلال گھاٹ پر کیا جا رہا ہے۔ انہوں نے بتایا کہ گھاٹوں پر لکڑیوں کا انتظام کر دیا گیا ہے۔