وسنت وہار کالونی کے رہائشی پریشان کیوں؟

وسنت وہار کالونی کے رہائشی ان دنوں میونسپل کونسل کے عہدیداروں اور عملہ کی لاپروائی کی وجہ سے پریشان ہیں، یہاں کے باشندوں نے الزام لگایا ہے کہ سڑک کو 3 ماہ قبل اکھاڑ دیا گیا تھا جو اب تک دوبارہ نہیں بن پایا ہے اور یہاں کوئی عملہ صفائی کے لئے موجود نہیں ہے جس وجہ سے انہیں خود ہی صفائی کرنی پڑ رہی ہے۔

ریاست اترپردیش کے امروہہ ضلع کے گجرولا میونسپل کونسل کو صاف صفائی کے لئے کئی بار اعزاز سے نوازا جا چکا ہے لیکن زمینی حقیقت کچھ اور ہی بیان کر رہی ہے۔

ان دنوں نگر پالیکا پریشد کے علاقوں میں واقع وسنت وہار کالونی کے رہائشی صفائی اور ترقیاتی کام رکنے کی وجہ سے پریشان ہیں۔

وسنت وہار کالونی کے باشندوں نے بتایا کہ ان کی کالونی کی سڑک 3 ماہ قبل تعمیر کے مقصد سے اکھاڑ دی گئی تھی لیکن تین ماہ گزرنے کے بعد بھی سڑک ٹھیک نہیں ہوئی ہے۔

ان کا کہنا ہے کہ سڑک مکمل طور پر ٹوٹ چکی ہے جس کی وجہ سے پریشانی کا سامنا کرنا پڑ رہا ہے، نالوں کا گندا پانی سڑک پر آگیا ہے جس کی صفائی کے لئے کوئی بھی ملازم نہیں آتا ہے۔

انہوں نے کہا کہ بار بار میونسپل حکام سے شکایت کرنے کے بعد بھی اس معاملے کا حل تلاش کرنے میں گجرولا میونسپل کونسل ناکام ہے جس کی وجہ سے اُنہیں گندگی میں رہنا پڑ رہا ہے۔