Muslim Youth Beaten Badly مویشی چوری کے الزام میں مسلم نوجوان کی درخت سے باندھ کر پٹائی

ضلع مظفر نگر میں شادی کی تقریب میں شامل ہونے آئے مسلم نوجوان کی درخت سے باندھ کر بے رحمی سے پٹائی کی گئی۔ ہندو شدت پسندوں نے مویشی کی چوری کا الزام لگا کرمتاثرہ نوجوان کو بے رحمی سے پیٹا۔ A Muslim youth was tied to a tree and beaten on the charge of cattle theft

مظفر نگر: ریاست اترپردیش کے ضلع مظفر نگر میں اتوار کو کچھ ہندو شدت پسندوں نے ایک مسلم نوجوان کو درخت سے باندھ کر بے رحمی سے پیٹا۔ متاثرہ نوجوان شادی کی تیاری کے لئے شاپنگ کرنے نکلا تھا، اس دوران متاثرہ کو کچھ ہندو شدت پسند نے مویشی کی چوری کا الزام لگا کر اٹھا لے گئے اور درخت سے باندھ کر سرعام لاٹھیوں اور لوہے کی راڈ سے پیٹا۔ نوجوان کی پٹائی کا ویڈیو سوشل میڈیا پر وائرل ہو رہا ہے۔ پولیس نے ویڈیو کا نوٹس لیتے ہوئے دو ملزمان کو گرفتار کر لیا ہے۔

بتایا جارہا ہے کہ مظفر نگر کے شاہ پور تھانہ علاقے کے تحت بروالا گاؤں کے رہنے والے ویدک کے چھوٹے بھائی کی شادی اتوار کو تھی۔ ویدک کے خاندانی بھائی مقیم ولد شہاب الدین ساکن پاسونڈا غازی آباد بھی شادی میں شرکت کے لیے آئے تھے۔ ہفتے کی رات جب مقیم اپنے ساتھیوں کے ساتھ خریداری کے بعد گاؤں بروالا واپس آ رہا تھا تو گڑھی درگن پور گاؤں کے قریب ان کی کار حادثہ کا شکار ہو کر تباہ ہوگئی، جس کے بعد سب لوگ پیدل گاؤں کی طرف چل پڑے۔ پھر اسی دوران کچھ لوگوں نے مقیم کو پکڑ لیا اور اس پر مویشی چرانے کا الزام لگا کر مارا پیٹا۔ جس کے بعد گڑھی درگن پور کے کچھ لوگ رات ہی میں مقیم کو اپنے ساتھ لے گئے۔ پھر صبح مقیم پر مویشی چوری کا الزام لگا کر اسے درخت سے باندھ کر لاٹھیوں سے پیٹا۔ کسی نے اس مار پیٹ کی ویڈیو بنا کر سوشل میڈیا پر وائرل کر دیا۔

اس معاملے میں مظفر نگر کے شاہ پور تھانے کے انچارج انسپکٹر نے بتایا کہ گڑھی درگن پور کے رہنے والے عمران اور کاظم کو اس معاملے میں گرفتار کیا گیا ہے۔ پولیس معاملے کی تحقیقات کر رہی ہے۔ تاہم ای ٹی وی بھارت اس وائرل ویڈیو کی تصدیق نہیں کرتا ہے۔