ریاست اترپردیش کے گریٹر نوئیڈا میں واقع دہلی پبلک اسکول کے طالب علم محمد زید حسن نے سی بی ایس ای کلاس 10 بورڈ کے امتحان میں سنسکرت مضمون میں 100 میں سے 100 نمبر حاصل کیے ہیں۔
بتایا گیا کہ زید کے والدین پیشے سے ڈاکٹر ہیں اور ان کے خیالات معاشرتی ہم آہنگی سے متاثر ہیں۔زید نے سنسکرت کی طرف دلچسپی بڑھانے کا سہرا اپنے سنسکرت کے استاد سدھاکر مشرا کو دیا ہے۔ اسکول کی پرنسپل سندھیا اوستھی نے زید کو اس کارنامے پر مبارکباد اور نیک خواہشات پیش کی ہیں۔
انہوں نے کہا کہ اسکول میں سنسکرت چوتھی جماعت سے ہی پڑھائی جاتی ہے۔ بچوں کو کئی زبانوں کا آپشن دیا جاتا ہے ، ان میں سے زید نے سنسکرت کا انتخاب کیا۔اسی دوران، زید کے سنسکرت کے استاد سدھاکر مشرا کا کہنا ہے کہ وہ زید کو چھٹی جماعت سے پڑھا رہے ہیں۔ اسے سنسکرت میں گہری دلچسپی ہے۔ اس کے ساتھ ، تکنیکی معاملات میں بھی زید کی مضبوط گرفت ہے۔دسویں کے بعد، زید سائنس میں انٹرمیڈیٹ کرنا چاہتا ہے۔ اس کے بعد، مستقبل میں وہ سائنس اور سنسکرت کو ملا کر تحقیقی کام کرنے کا خواہشمند ہے۔
دسویں کے دوسرے مضامین میں زید کے نمبر بھی قابل ستائش ہیں۔ انہوں نے انگریزی اور ریاضی میں 98 ، سائنس میں 95 ، سوشل سائنس میں 96 اور آئی ٹی میں 99 اسکور کیے ہیں۔
یہ بھی پڑھیں:بریگیڈیئرعثمان کا آبائی قصبہ بنیادی سہولیات سے محروم