مراد آباد: کشمیری پنڈتوں کے مبینہ قتل پر بجرنگ دل کا احتجاج

اترپردیش کے مرادآباد میں کشمیری پنڈتوں کی مبینہ قتل کو لیکر بجرنگ دل کے عہدیدار اور کارکنان نے پتلا نذر آتش کرکے پاکستان مردہ باد کے نعرے لگائے اور حکومت سے مطالبہ کیا کہ پاکستان کو اسی زبان میں جواب دیں جس طرح کی حرکتیں پاکستان کر رہا ہے۔

جموں و کشمیر میں ہوئے عسکری حملے کو لیکر مراد آباد میں بجرنگ دل کی جانب سے احتجاج کیا گیا۔ اس دوران بجرنگ دل کے عہدیدار اور کارکنان نے پتلا نذر آتش کرکے پاکستان مردہ باد کے بھی نعرے لگائے۔

اس سلسلے میں بجرنگ دل کے کارکن مونو چودھری نے کہا کہ جموں و کشمیر میں کشمیری پنڈتوں کے قتل کے بعد اب اقلیتی لوگوں کا بھی قتل کیا جا رہا ہے۔انہوں نے مزید کہا کہ وزیر اعظم نریندر مودی پاکستان کو اسی زبان میں جواب دیں جس طرح کی حرکتیں پاکستان کر رہا ہے۔

واضح رہے کہ گزشتہ روز سرینگر کے عیدگاہ کے اندرون علاقے سنگم میں نامعلوم عسکریت پسندوں نے سرکاری ہائر سیکنڈری اسکول کے اساتذہ کو مبینہ طور پر گولی مارکر ہلاک کردیا تھا۔ اس حملے میں ایک مرد اور ایک خاتون استاد ہلاک ہوئے تھے جن کی شناخت ستیندر کور اور دیپک چند کے طور پر کی گئی تھی۔