سیاسی جماعتوں کا مقصد ریاست میں بدامنی پھیلانا ہے: محسن رضا

ہاتھرس جنسی زیادتی معاملے پر سیاسی ہلچل بڑھتی ہی جا رہی ہے جس کے بعد اتر پردیش کے ریاستی وزیر محسن رضا نے حزب اختلاف پر الزام عائد کیا کہ وہ ہندوؤں کو آپس میں لڑانے کی سازش کر رہے ہیں۔

اُتر پردیش کے وزیر مملکت محسن رضا نے اپنے ایک بیان میں آج کہا کہ 'سبھی سیاسی جماعتوں کے رہنما ہاتھرس کیس کے بہانے اترپردیش کو تشدد کی آگ میں جھونکنے پر آمادہ ہیں'۔

انہوں نے کہا کہ سبھی اپوزیشن جماعتوں کی منشا ریاست میں بدامنی پھیلانے کی ہے تا کہ وہ اپنی سیاسی روٹیاں سینک سکیں۔ انہیں متاثرہ خاندان سے کوئی ہمدردی نہیں ہے، یہ صرف اپنے مفاد کے لیے اوچھی سیاست کر رہے ہیں۔

محسن رضا نے مزید کہا کہ سماجوادی پارٹی، بہوجن سماج پارٹی، کانگریس اور عام آدمی پارٹی سازش کے تحت ایسا کر رہی ہیں۔