Moharram Processions in Meerut میرٹھ کے عبداللہ پور میں تاریخی جلوس اور ذوا لجناح برآمد

ہندو مسلم ایکتا کی مثال میرٹھ کے عبداللہ پور میں ساتویں محرم کوامام بارگاہ سے تاریخی جلوس برآمد ہوا جس میں دیگر مذاہب کے لوگوں نے بھی شرکت کی۔

میرٹھ کے عبداللہ پور میں تاریخی جلوس اور ذوا لجناح برآمد

میرٹھ:ہندو مسلم ایکتا کی مثال میرٹھ کے عبداللہ پور میں ساتویں محرم کو نکالے جانے والے تاریخی جلوس میں نہ صرف اہل تشیع حضرات شرکت کرتے ہیں بلکہ جلوس میں عزاداران شہداء کربلا کے عقیدت مندوں اور ذو الجناح کےلیے ہندو مذہب سے تعلق رکھنے والے لوگ کھانے کی اشیاء کے ساتھ سبیل کا بھی انتظام کرتے ہیں۔

ریاست اتر پردیش کے ضلع میرٹھ میں تھانہ بھاونا پور علاقے کے عبداللہ پور میں 7 محرم الحرام کو امام بارگاہ سے تاریخی جلوس اور ذو الجناح برآمد ہوا۔ یہ تاریخی جلوس عبداللہ پور کی تنگ گلیوں سے ہوتا ہوا واپس امام بارگاہ کوٹ میں مکمل ہوا۔ جلوس کے دوران راستے میں ماتم پرسی کر رہے عزاداران کے لیے مقامی لوگوں کی جانب کھانے پینے کی اشیاء کے ساتھ سبیلیں بھی لگائی جاتی ہیں۔ اس موقعے پر علاقے میں روایتی بھائی چارے کی جھلک بھی دکھائی دی کیونکہ عزاداروں کیلئے کھانے پینے کی اشیاء کا اہتمام اکثریتی فرقے سے تعلق رکھنے والے لوگوں نے بھی کیا تھا۔

جلوس میں حضرت قاسم کی ذو الجناح برآمد ہوتا ہے جسے ہر کوئی اپنے گھر بلا کر اس کے لیے کھانے پینے کا اہتمام کرتا ہے. مقامی لوگوں جن میں ہندوؤں کی ایک بڑی تعداد بھی شامل ہے کا اعتقاد ہے کہ ذو الجناح کو بلاکر عزادوروں کی خدمت کرنے کے ساتھ جو مرادیں مانگی جاتی ہیں، وہ پوری ہوجاتی ہیں۔ مقامی لوگوں کے مطابق ذوالجناح کے دوران روایتی بھائی چارہ اس علاقے کا امتیاز رہا ہے اور ملک میں سیاسی مفادات کیلئے عام کی گئی مذہبی منافرت اور اس طرح کے ماحول کا اثر انکی برادری پر نہیں پڑا ہے اور مستقبل میں بھی منافرت کی فضا پھیلانے والوں کو اس علاقے سے دور رکھا جائے گا۔