Misbehavior With A Burqa wearing Girl مظفرنگر میں برقعہ پوش لڑکی کے ساتھ بدتمیزی

مظفرنگر میں ایک ویڈیو سوشل میڈیا پر وائرل ہورہا ہے جس میں ایک برقعہ پوش لڑکی ایک نوجوان کے ساتھ موٹر سائیکل پر جارہی ہے اسی دوران کچھ نوجوانوں نے انہیں بیچ سڑک پر روک کر لڑکی کے چہرے سے نقاب ہٹاتے ہوئے نظر آرہے ہیں۔

مظفرنگر: ریاست اترپردیش کے مظفر نگر ضلع میں سوشل میڈیا پر ایک ویڈیو وائرل ہورہا ہے، جس میں موٹر سائیکل پر سوار ایک نوجوان برقعہ پوش لڑکی کو لے جا رہا ہے، جب کہ کار سوار کچھ دبنگ نوجوان ان کا پیچھا کر کے انہیں بیچ سڑک میں ہی روک لیتے ہیں اور پھر بدتمیزی کرتے ہوئے لڑکی کے چہرے سے نقاب ہٹا دیتے ہیں، اس دوران کار میں سوار ایک نوجوان نے یہ پورا واقعہ اپنے موبائل میں قید کر لیا، جو بعد میں سوشل میڈیا پر وائرل ہو گیا۔ بتایا جارہا ہے کہ لڑکے کا تعلق دوسرے مذہب سے ہے۔

اس ویڈیو کے وائرل ہونے کے بعد پولیس نے موٹر سائیکل سوار نوجوان کی تحریر پر مقدمہ درج کرتے ہوئے دبنگ نوجوانوں کی گرفتاری کی کوشش شروع کردی ہے۔ آپ کو بتا دیں کے یہ واقعہ 13 مئی کو نئی منڈی کوتوالی علاقے کی گاندھی کالونی میں پیش آیا، جب ایک نوجوان لڑکا برقع پوش لڑکی کو موٹر سائیکل پر لے جا رہا تھا، اسی دوران کار میں سوار کچھ دبنگ نوجوانوں نے ان کا پیچھا کیا اور انہیں بیچ سڑج پر روک کر دبنگائی کا مظاہرہ کیا۔ انہوں نے برقعہ پوش لڑکی کے چہرے سے نقاب ہٹا کر اس کے ساتھ بدتمیزی کی۔ اس واقعے کا ویڈیو سوشل میڈیا پر وائرل ہونے کے بعد فوری طور پر موٹر سائیکل سوار متاثرہ شخص کی تحریر پر مقدمہ درج کرکے ملزم نوجوان کی گرفتاری کے لیے کوششیں شروع کردی ہیں۔ تاہم ابھی تک یہ بات سامنے نہیں آئی کہ موٹر سائیکل سوار رشتہ دار تھے یا دوست، اور نہ ہی کار سواروں کی ابھی تک شناخت ہو سکی ہے۔

اس واقعہ کے بارے میں ایس پی سٹی ستیہ نارائن پرجاپت نے بتایا کہ پولیس اسٹیشن نئی منڈی علاقے سے سوشل میڈیا پر ایک ویڈیو کا نوٹس لیا گیا ہے، جس میں ایک خاتون اور ایک مرد موٹر سائیکل پر جا رہے ہیں اور کچھ نامعلوم افراد ان کا پیچھا کر رہے ہیں اور اس کے بعد خاتون کے ساتھ بدتمیزی کی جاتی ہے، اس معاملے میں موٹر سائیکل سوار نے تھانے میں شکایت کر اپنی تحریر بھی دی ہے، جس کی بنیاد پر تھانہ نئی منڈی میں متعلقہ دفعات کے تحت مقدمہ درج کیا گیا ہے، نامعلوم افراد کے بارے میں معلومات کی جا رہی ہے نام سامنے آئیں گے تو ان کے خلاف ضروری کارروائی کی جائے گی۔