کانگریس اقلیتی سیل کا اے ڈی ایم کو میمورنڈم

بارہ بنکی میں مسجد میں نماز کی پابندی کے معاملے میں آج کانگریس اقلیتی سیل نے اے ڈی ایم سے ملاقات کر کے کچھ مطالبات پیش کیے۔

ریاست اترپردیش کے ضلع بارہ بنکی کی تحصیل رام سنیہی گھاٹ کے احاطے میں واقع مسجد میں نماز کی پابندی کے معاملے میں اقلیتی کانگریس کی جانب سے اے ڈی ایم کو میمورنڈم دیا گیا۔

اس میمورنڈم کے حوالے سے اے ڈی ایم سے مطالبہ کیا گیا ہے کہ مسجد میں نماز دوبارہ شروع کی جائے اور اس معاملے میں بے قصوروں پر کی جارہی ناجائز کارروائی پر روک لگائی جائے۔

واضح رہے کہ آج صبح تقریباً 11 بجے اقلیتی کانگریس کے ریاست نائب صدر کتاب اللہ کی قیادت میں کانگریس کے درجنوں کارکنان نے اے ڈی ایم دفتر پہنچے اور میمورنڈم دیا۔

اس موقع پر کتاب اللہ انصاری نے کہا کہ ہم نے مسجد میں دوبارہ نماز شروع کرنے اور بے قصوروں پر ناجائز کارروائی نہ کرنے کا مطالبہ کیا ہے۔

انہوں نے بتایا کہ اے ڈی ایم نے یقین دہانی کرائی ہے کہ تمام مسائل پر غور کیا جائے گا۔

اس موقع پر انہوں نے ریاستی حکومت پر بھی شدید نکتہ چینی کی اور کہا کہ ریاستی حکومت تمام محاذ پر ناکام ہے اس لیے وہ عوام کے ذہن بانٹنا چاہتی ہے۔