بارہ بنکی: منڈی یوزرس فیس کے خلاف تاجر، ڈی ایم کو دیا میمورنڈم

مرکزی حکومت کی جانب سے منڈی فیس معاف کئے جانے کے بعد ریاستی حکومت کی جانب سے منڈی قانون میں ترمیم کئے جانے کی مخالفت شروع ہو گئی ہے۔

اترپردیش کے ضلع بارہ بنکی میں تاجروں کی تنظیم اتر پردیش ادیوگ ویاپار پرتیندھی منڈل نے منڈی قانون میں ترمیم کئے جانے کی مخالفت میں سنیچر کو وزیراعلیٰ کو مخاطب میمورنڈم دیا ہے۔ اس کے علاوہ انہوں نے بازاروں کا روسٹر ختم کرنے کا مطالبہ کیا ہے۔

غور طلب ہے کہ مرکزی حکومت نے کچھ روز قبل منڈی فیس ختم کر دی ہے۔ تاجر اس فیصلے سے خوش ہیں اور اس کے لئے انہوں نے وزیراعظم کی تعریف بھی کی ہے، لیکن ریاستی حکومت کے منڈی قانون میں ترمیم سے وہ مطمئن نہیں ہیں۔

اس کے تحت منڈی کے اندر 2 فیصد فیس اور 1 فیصدی یوزر چارج دینا ہے جبکہ منڈی کے باہر کوئی فیس نہیں ہے۔ تاجروں کا کہنا ہے اس نظام کو ایک ملک ایک ٹیکس کی ہی طرح ہونا چاہئے۔

تاجروں کا کہنا ہے کہ اس سے قیمتوں میں اضافہ ہوگا، ساتھ ہی کسانوں کو بھی رعایت ہوگی کہ وہ جہاں چاہیں اپنی اشیا فروخت کر سکتے ہیں۔

انہوں نے وزیراعلیٰ کو مشورہ دیا ہے کہ اس کے لئے وہ تاجروں کی ایسوسی ایشن تشکیل کرکے منڈی میں کام کاج کے لئے رقم لے سکتے ہیں۔

اس کے علاوہ تاجروں نے ڈی ایم سے مطالبہ کیا ہے کہ وہ بازاروں کے لئے جاری روسٹر ختم کر دیں کیونکہ بڑی تعداد میں تاجر غیر قانونی طور سے دکانیں مجبوری میں کھول رہے ہیں اسلئے روسٹر ختم کر دیا جائے تاکہ تاجر غیر قانونی کام نہ کر سکیں۔