بارہ بنکی: نرسنگھا نند کے خلاف علماء کرام کا میمورنڈم

پیغمبر اسلام حضرت محمد مصطفیٰ صلی اللہ علیہ السلام کی شان میں گستاخی کرنے والے شرپسند مہنت نرسنگھا نند سرسوتی کے اشتعال انگیز بیان کے خلاف مسلم طبقے میں غصہ کم ہونے کا نام نہیں لے رہا ہے۔ 10 روز گزرنے کے باوجود نرسنگھا نند پر کاروائی نہ ہونے سے لوگوں میں اور غصہ بڑھ رہا ہے۔

ریاست اتر پردیش کےضلع بارہ بنکی میں دوشنبے کو ضلع کے الگ الگ قصبات کے 29 علماء کرام نے صدر جمہوریہ کو میمورنڈم دیا اور نرسنگھا نند کے خلاف سخت کاروائی کئے جانے کا مطالبہ کیا۔
ضلع کے تمام قصبات کے علماء کرام شہر قاضی مولانا عبد المصطفی صدیقی حشمتی کی قیادت میں ضلع مجسٹریٹ کے دفتر پہونچے یہاں ڈی ایم کے غیر حاضر ہونے پر انہوں نے اے ڈی ایم سندیپ کمار گپتا کے توسط سے صدر جمہوریہ کو میمورنڈم بھیجا گیا

اس موقع پر مولانا عبدالمصطفی صدیقی حشمتی نے کہا کہ مسلمان ایک ایسی قوم کا نام ہے جو سب کچھ برداشت کر سکتا ہے، لیکن اپنے پیغمبر کی شان میں گستاخی برداشت نہیں کر سکتا۔

انہوں نے کہا کہ آج 10 روز ہو گئے ہیں حضور کی شان گستاخی کرنے والے پر کوئی کاروائی نہیں کی گئی ہے۔ اس کی وجہ سے مسلم طبقے میں بےچینی اور خلفشار ہے۔

انہوں نے مزید کہا کہ ملک کو آزاد کرانے میں مسلمانوں کا اہم کردار رہا ہے۔ مگر افسوس کی بات یہ ہیں کہ جنگ آزادی سے دور رہنے والے لوگ اس قسم کی بات کر کے ہندو مسلمان کے درمیان تفریق ڈالنے کی کوشش کر رہے ہیں۔

انہوں نے مطالبہ کیا کہ حکومت ایسے افراد کے خلاف سخت سے سخت کاروائی کرے۔تاکہ آئندہ اس قسم کی حرکت کی کوئی جرت نہ کرے۔