'ہاتھرس کی متاثرہ کو انصاف دلانے کے لئے صدر جمہوریہ سے مدد کی اپیل'

مایاوتی نے ہفتے کے روز ٹویٹ کیا 'ہاتھرس کے اجتماعی عصمت دری معاملے کے تعلق سے پورے ملک میں زبردست غصہ ہے۔ اس کی ابتدائی تحقیقات سے عوام مطمئن نہیں ہیں'۔

بہوجن سماج پارٹی (بی ایس پی) کی سپریمو مایاوتی نے ہاتھرس اجتماعی عصمت دری کے معاملے کی تحقیقات مرکزی تفتیشی بیورو (سی بی آئی) سے کرانے کا مطالبہ کیا ہے اور صدر جمہوریہ رام ناتھ کووند سے متاثرین کنبے کو انصاف دلانے کے لئے مداخلت کی اپیل کی ہے۔

محترمہ مایاوتی نے ہفتے کے روز ٹویٹ کیا 'ہاتھرس کے اجتماعی عصمت دری معاملے کے تعلق سے پورے ملک میں زبردست غصہ ہے۔ اس کی ابتدائی تحقیقات سے عوام مطمئن نہیں ہیں۔ اس معاملے کی سی بی آئی یا پھر سپریم کورٹ کی نگرانی میں جانچ ہونی چاہئے، بی ایس پی کی یہ ہی مانگ ہے'۔

انہوں نے کہا 'ملک کے صدر یوپی سے آئے ہیں اور وہ ایک دلت ہونے کی وجہ سے بھی اس معاملے میں بالخصوص حکومت کے غیر انسانی رویے کو مد نظر رکھ کر متاثرہ کے خانہ افراد کو انصاف دلانے کے لئے مداخلت کریں'۔

واضح رہے کہ ہاتھرس میں متاثرہ کی موت کے بعد حزب اختلاف بالخصوص کانگریس، سماج وادی پارٹی (ایس پی) اور عام آدمی پارٹی (آپ) سڑکوں پر ہیں۔ بی ایس پی سپریمو اپنے بیانات کے ذریعہ ہاتھرس واقعہ پر برہمی کا اظہار کرتی رہی ہے۔