کووڈ 19 سے متعلق مولانا خالد رشید فرنگی محلی کی عوام سے اپیل

اتر پردیش کے دارالحکومت لکھنؤ میں کورونا وائرس متاثرہ مریضوں کی تعداد میں مسلسل اضافہ ہوتا جا رہا ہے جس کے سبب لکھنؤ عیدگاہ کے امام مولانا خالد رشید فرنگی محلی نے عوام سے اپیل کی ہے کہ کہ اس مشکل دور میں ہر کسی کی مدد کریں۔

اتر پردیش میں کورونا وائرس کی وجہ سے بگڑتی صورتحال کے سبب آل انڈیا مسلم پرسنل لا بورڈ کے رکن مولانا خالد رشید فرنگی نے عوام سے اپیل کی کہ ایسی تشویشناک صورتحال میں سبھی لوگ ایک دوسرے کا ساتھ دیں۔

اتر پردیش میں کورونا وائرس تیزی سے بڑھ رہا ہے جس کی وجہ سے انتظامیہ تشویش میں مبتلا ہے اور اس مہلک وبا سے مقابلہ کرنے کے لیے کمربستہ ہے لیکن ایسے میں وسائل کی کمی سبھی کے سامنے بڑا مسئلہ بن گیا ہے۔ حالات یہ ہیں کہ مریضوں کو ہسپتال میں داخل نہیں کیا جا رہا وہیں مریضوں کو آکسیجن اور دیگر ضروری دوائیں نہ ملنا بھی مزید مشکلات پیدا کر رہا ہے۔

لکھنؤ عید گاہ کے امام مولانا خالد رشید فرنگی نے ریاست کے عوام سے اپیل کی ہے کہ وہ اس مشکل دور میں ایک دوسرے کا ساتھ دیں اور طبی لوازمات کی کسی بھی طرح کی کوئی کالا بازاری نہ کریں۔

انہوں نےکہا کہ 'کووڈ 19 کے اس دور میں بہت زیادہ لوگ کورونا کی زد میں آ رہے ہیں لیکن کسی کو گھبرانے کی ضرورت نہیں ہے بلکہ تمام لوگ احتیاط کریں اور کورونا گائیڈ لائنز پر عمل کریں۔