لکھنئو:رسولﷺ کی گستاخی کے معاملے میںمولانا کلب جواد نے سرزمین ایران سے ایک بیان جاری کرتے ہوئے کہا کہ اسلام ہر مذہب اور اس کی مقدس شخصیات کے احترام کا قائل ہے۔ ہم کسی بھی مذہب کے مقدسات کی اہانت اور منقصت کو خلاف شرع سمجھتے ہیں۔مولانا نے کہا کہ گذشتہ کچھ سالوں میں رسول خداؐ اور دین اسلام کے خلاف جس طرح زہر پاشی کی گئی ہے اس نے ملک کی فضا کو مکدر کر دیا ہے۔ یہ اسلامو فوبیا کی بدترین شکل ہے جو ملک کے بھائی چارہ کے لیے انتہائی خطرناک ہے۔
ایسے تخریبی و شر پسند عناصر کو صرف پارٹی سے برخاست کرنا کافی نہیں ہے بلکہ ان کے خلاف سخت قانونی کاروائی ہونی چاہیے۔مولانا نے کہا کہ المیہ یہ ہے کہ ایسے افراد کو پیغمبر خداؐ کی زندگی اور اسلامی تعلیمات کا بالکل علم نہیں ہوتا اور نہ ہی یہ لوگ اس بارے میں مطالعہ کرنے کی زحمت کرتے ہیں۔ لاعلمی ہر فساد اور برائی کی جڑ ہے۔ یا پھر جان بوجھ کر ملک کے ماحول کو خراب کرنے کی کوشش کی جارہی ہے جس پر حکومت اور سپریم کورٹ کو سنجیدگی سے سوچنے کی ضرورت ہے۔