مئو: پسماندہ طبقات کے لئے محکمہ صحت کا کیمپ

مئو میں پسماندہ طبقات کے لئے محکمہ صحت کا کیمپ لگایا گیا۔ مریضوں کو سرکاری ہسپتالوں کے چکر لگانے سے اب راحت مل سکتی ہے۔

ریاست اترپردیش کے ضلع مئو کے پسماندہ طبقات کے لیے محکمہ صحت مخصوص کیمپ کا انعقاد کر رہا ہے۔ 'جن آروگیہ میلا' پروگرام کے بینر تلے یہ خدمات انجام دی جارہی ہیں۔ کیمپ میں ضلع ہسپتال کے اسسٹنٹ چیف میڈیکل آفیسر ڈاکٹر جاوید اختر کی قیادت میں ماہر ڈاکٹروں کی ٹیم کارفرما ہے۔

مئو شہر میں پسماندہ طبقات کی کثیر آبادی کے مد نظر یہ ہیلتھ کیمپ کافی اہمیت کا حامل ہے۔ اگرچہ 'جن آروگیہ میلا' پروگرام دو سال قبل شروع کیا گیا تھا، لیکن لاک ڈاؤن کا اعلان ہوتے ہی اسے بند کر دیا گیا۔ اب ہر اتوار کو یہ خدمات ایک بار پھر فراہم کی جا رہی ہیں۔ یہاں علاج اور دوائیں پوری طرح مفت مہیا کرائی گئیں۔

اس کے علاوہ مضر امراض سے متعلق ٹیسٹ بھی یہاں مفت میں کرانے کی سہولیات دستیاب ہیں۔ آروگیہ میلے میں مریضوں کی تعداد کافی کم نظر آئی۔ اس کی ایک وجہ ایسے فلاحی پروگرامز کو عوامی سطح پر کم مشتہر کیا جانا بھی ہے۔

ماہر ڈاکٹروں کے مطابق مئو کے بنکروں کا ایک بڑا طبقہ پسماندہ حالات میں زندگی بسر کر رہا ہے۔ اس طبقہ کو طبی خدمات کی سخت ضرورت ہے۔