Masks Mandatory In Noida نوئیڈا میں ماسک پہننا لازمی

محکمہ صحت نے نوئیڈا ضلع کے تمام اسکولوں، کالجوں، دفاتر، شاپنگ مالز اور عوامی مقامات پر ماسک پہننا لازمی قرار دیا ہے۔ ریلوے اور بس اسٹیشنوں کے گیٹ پر مسافروں کی تھرمل اسکریننگ کی جائے گی۔ شہر میں آئے روز کورونا کیسز میں تیزی سے اضافہ ہو رہا ہے۔

نوئیڈا:ملک کی دوسری ریاستوں کی اترپردیش میں بھی کورونا وائرس کے فعال کیسز کی تعداد میں تشویشناک اضافہ ہوا ہے۔حکومت کی جانب سے الرٹ جاری کیا گیا ہے۔اسی درمیان انفیکشن کے بڑھتے ہوئے کیسز کو دیکھتے ہوئے ضلعی محکمہ صحت نے ہدایات جاری کرتے ہوئے ہر جگہ ماسک لگانا ضروری قرار دیا ہے۔ پہلے صرف سرکاری اور نجی ہسپتالوں میں ماسک پہننا ضروری تھا۔ نزلہ، زکام، بخار یا فلو کی علامات ظاہر ہونے پر مریض کو قرنطینہ میں رہنے کی ہدایت کی گئی ہے۔

اس کے ساتھ ہی سرکاری اور نجی ہسپتالوں کے لئے بھی کووڈ پروٹوکول کو لازمی قرار دیا گیا ہے۔ ماسک کے بغیر داخلہ ممنوع ہوگا۔ اس کے ساتھ ہی فیور ہیلپ ڈیسک اور کووڈ ہیلپ ڈیسک قائم کرنے کی بھی ہدایات دی گئی ہیں۔ ہسپتالوں کے رجسٹریشن کاؤنٹرز اور میڈیسن کاؤنٹرز پر قطاروں میں کھڑے ہونے کی ہدایات دی گئی ہیں، جسمانی فاصلے کی پاسداری کرتے ہوئے شادی بیاہ اور دیگر تقریبات میں ماسک اور جسمانی فاصلہ کی لازمی پابندی کی ہدایات دی گئی ہیں۔

سنیما ہالز کو 50 فیصد: گنجائش کے ساتھ ایک سیٹ خالی رکھنے کی ہدایت کی گئی ہے۔ سینما میں ماسک کے بغیر بھی داخلہ نہیں دیا جائے گا۔ لوگوں کو بازاروں اور مالز میں خریداری کے دوران ماسک اور دستانے پہننے کی ہدایت کی گئی ہے۔ بسوں اور میٹرو میں باقاعدگی کے ساتھ سینیٹائزیشن کرنا ہوگی۔

بچوں اور بوڑھوں کو بھیڑ والی جگہوں پر نہ جانے کا مشورہ دیا گیا ہے۔ گردے، دل، جگر، ذیابیطس، سانس کی بیماریوں کے علاوہ خون سے متعلق امراض میں مبتلا افراد کو گھر سے باہر نکلنے سے گریز کرنے کا مشورہ دیا گیا ہے