Markazi Seerat In Jaunpur جونپور میں جلوس محمدی کی تیاریاں مکمل، شوکت علی

جونپور میں عیدمیلاد النبی مرکزی سیرت کمیٹی کی نگرانی میں 28 ستمبر کو جلوس محمدی کی تیاریاں زور شور سے جاری ہے۔ کمیٹی کے نومنتخب صدر نے آج جلوس کی تیاریوں کا جائزہ لیا۔ انہوں نے کہاکہ ہر سال کی طرح امسال بھی جلوس محمدی کا روایتی انداز میں اہتمام کیا جائے گا۔

جونپور: ملک کی دوسری ریاستوں کی طرح اترپردیش کے ضلع جونپور سمیت تمام اضلاع میں ربیع الاول کی آمد پر عید میلادالنبی کی تیاریاں آخری مرحلے میں ہیں۔ گلیوں،چوراہوں،رہائش گاہوں اور مسجدوں کو مسلمان آخری نبی حضرت محمد صلی اللہ علیہ وسلم کی ولادت کے نسبت سے مختلف اقسام کی لائیٹوں اور جھالروں سے سجانے کا کام آخری مرحلے میں جاری ہے۔ اس ضمن میں شیراز ہند جونپور میں 12 ربیع الاوّل کو جشن یوم النبی و جلوس مدح صحابہ کا انعقاد کیا جاتا ہے جس میں پورے اتر پردیش سے لوگ شامل ہوتے ہیں۔

ای ٹی وی بھارت سے گفتگو کرتے ہوئے مرکزی سیرت کمیٹی کے نومنتخب صدر شوکت علی عرف منا راجا نے ماہ ربیع الاوّل کی مبارکباد پیش کرتے ہوئے کہا بتایا کہ ایک ربیع الاوّل کو لے کر ہماری تیاریاں جاری ہیں۔ ہماری تمام تیاریاں جلوس کو لیکر تقریباً مکمل ہو چکی ہیں۔

منا راجا نے جونپور کے مسلمانوں سے اپیل کرتے ہوئے کہا حضور صلی اللہ علیہ وسلم کی آمد کا جشن منائیں اپنے گھروں،گلیوں،محلوں اور مساجد کو سجائیں اور 28 ستمبر کو ہونے والے تاریخی جلسہ و جلوس میں شرکت کرکے پروگرام کو کامیاب بنائیں۔

شوکت علی نے بتایا کہ اس جلوس میں سب سے اہم کردار سجاوٹ کمیٹیوں،فن سپاہ گری کے اکھاڑے،نعت خواں انجمنوں کا ہوتا ہے ان سے بھی ملکر ان کی تیاریوں کا جائزہ لیا جا رہا ہے اور ان کی حوصلہ افزائی کی جا رہی ہے۔

انہوں نے کہاکہ شیراز ہند جونپور قومی یک جہتی کے لیے مشہور ہے۔ اس جلوس میں جہاں مسلمانوں کی شرکت ہوتی ہے تو اس کو کامیاب بنانے اور اختتام پذیر کرانے میں غیر مسلموں کا بھی رول ہوتا ہے۔ اس لیے 12 ربیع الاوّل کو قدوئی پارک کوتوالی چوراہا پر جو قومی یک جہتی کے عنوان سے جلسہ ہوتا ہے اس میں ہندو مسلم سبھی برابر برابر شریک ہوتے ہیں۔