مثالی گاؤں شاہ پور میں مہاچوپال کا اہتمام

ریاست اترپردیش کے بارہ بنکی میں پیر کو مسولی بلاک واقع پارلیمان مثالی گاؤں (سانسد آدرش گرام) شاہ پور میں مہاچوپال کا انعقاد عمل میں لایا گیا جس میں انتظامیہ کا تقریباً تمام عملہ موجود رہا۔ یہاں گاؤں کے عوام کے مسائل سن کر ان کا حل نکالنے کی پوری کوشش کی گئی اور مثالی گاؤں میں ہوئے ترقیاتی کاموں کا جائزہ بھی لیا گیا۔ اس کے علاوہ حکومتی اسکیمز کے استفادہ کنندگان کو متعلقہ ضروری کاغذات بھی تقسیم کئے گئے۔ جبکہ مہاچوپال کی صدارت رکن پارلیمان اوپیندر راوت نے کی۔

مہاچوپال سے خطاب کرتے ہوئے رکن پارلیمان اوپیندر راوت نے گاؤں کے باشندوں کو بتایا کہ گاؤں کی ترقی عوام کے تعاون کے بغیر نہیں ہو سکتی۔ اس کے لئے گاؤں والوں کو اپنی سطح پر کام کرنا ہوگا۔ انہوں نے کہا کہ مہاچوپال میں تمام محکموں کے اسٹال بھی لگائے گئے جہاں وہ اپنی شکایات درج کرا سکتے ہیں۔

رکن پارلیمان نے دعویٰ کیا کہ یہاں کے دیہی علاقوں میں 18 گھنٹے بجلی دی جا رہی ہے۔ مہاچوپال میں ضلع مجسٹریٹ ڈاکٹر آدرش سنگھ نے تمام اہلکاروں کو ہدایات دی کہ وہ تمام استفادہ کنندگان کو صد فیصد فائدہ پہنچایا جائے جس سے یہ گاؤں مثالی بن سکے۔

مہاچوپال میں مثالی گاؤں شاہ پور کی ترقی کی تفصیلات پیش کی گئی جس میں محکمہ صحت کی جانب سے بتایا گیا کہ انہوں نے 654 کے مقابلے 504 کارڈ بنائے ہیں۔ منریگا کے تحت 145 جاب کارڈ، کسان سمان ندھی سے 484، 56 افراد کو ضعیفی پینشن اور 20 کو بعیوی پینشن کا فائدہ پہنچایا جا رہا ہے۔