NEET Exam Result 2022 مدارس کے متعدد طلبا نے نیٹ امتحان میں کامیابی حاصل کی

نیٹ امتحان میں مدارس کے فارغین نے بڑی تعداد میں کامیابی حاصل کی ہے۔ مدارس کے طلبا نے نہ صرف اپنے اہل خانہ بلکہ مدارس کا بھی نام روشن کیا ہے۔

لکھنؤ: گزشتہ روز نیٹ امتحان کے نتائج کا اعلان کردیا گیا جس میں مدارس کے فارغین نے بڑی تعداد میں کامیابی حاصل کی ہے۔ مدارس کے طلبا نے نہ صرف اپنے اہل خانہ بلکہ مدارس کا بھی نام روشن کیا ہے۔ مدارس کے تعلیمی معیار کے حوالے سے آئے دن کچھ نہ کچھ سوال اٹھتے رہتے ہیں لیکن مدارس کے طلباء نے نیٹ جیسے امتحان میں کامیابی حاصل کرکے یہ ثابت کردیا ہے کہ مدارس کے طلبہ کسی بھی میدان میں پیچھے نہیں ہیں۔ یہی نہیں یوپی ایس سی جیسے امتحان میں بھی کامیابی کا پرچم لہرا چکے ہیں۔

اس سلسلے میں لکھنؤ کے شاہی عیدگاہ عیش باغ کے امام مولانا خالد رشید فرنگی محلی نے نیٹ امتحان میں کامیاب ہونے والے تمام طلبا کو مبارکباد پیش کرتے ہوئے شاہین اکیڈمی کا ذکر کیا اور کہا کہ اکیڈمی کے چار حفاظ نے نیٹ امتحان میں کامیابی حاصل کی ہے۔ جس میں حافظ محمد علی اقبال، حافظ غلمان احمد زردی، حافظ محمد عبداللہ اور حافظ حزیفہ شامل ہیں۔

انہوں نے کہا کہ کی مدارس کے فارغین نہ صرف دینی تعلیم حاصل کررہے ہیں بلکہ دیناوی تعلیم میں بھی نمایاں کامیابی حاصل کر رہے ہیں۔ یہی وجہ ہے کہ نیٹ امتحان میں کئی حفاظ نے کامیابی حاصل کی ہے ان کو خصوصی طور پر مبارکباد پیش کرتا ہوں۔ انہوں نے کہا کہ مدرسہ میں تعلیم کا کیا معیار ہے ان بچوں نے واضح کر دیا ہے۔

مزید پڑھیں:

مولانا خالد نے مزید کہا کہ مدارس کی تعلیمی معیار پر سوال اٹھانے والے ان طلبہ کی کامیابی کو ضرور دیکھیں۔ مدرسہ کے فارغین طلبہ اگر نیٹ یا دیگر دنیاوی تعلیم میں کامیابی کا پرچم لہرانا چاہتے ہیں تو ان کے لیے شاہین اکیڈمی کا دروازہ کھلا ہے۔ لکھنؤ کے عیش باغ عید گاہ شاہ کے احاطے میں بھی شاہین اکیڈمی اپنی پوری دم خم کے ساتھ طلبہ و طالبات کو تعلیم دے رہا ہے۔