مسلم مسافر خانہ بدحالی کے کب تک آنسو بہائے گا؟

لکھنؤ کا مسلم مسافرخانہ ابھی تک اپنی بدحالی کے آنسو بہا رہا، لیکن جلد ہی وہ مسافروں کے لیے نئی سوغات لے کر آنے والا ہے۔

ریاست اترپردیش کے دارالحکومت لکھنؤ میں واقع مسلم مسافر خانہ پر ای ٹی وی بھارت گزشتہ برس مسافر کی شکایت کے بعد رپورٹنگ کی تھی، جس کا اثر یہ ہوا کہ ریاستی حج کمیٹی نے عمارت کے رنگ روغن، بجلی، بیت الخلاء، صاف پانی، اور دیگر کاموں کے لیے ایک کروڑ 17 لاکھ 78 ہزار روپے مختص کیے ہیں۔

واضح رہے کہ اس مختص پیسوں میں سے فی الحال 58 لاکھ 89 ہزار روپے اُتر پردیش وقف وکاس نگم کو جاری کردیا گیا ہے، تاکہ وہ ٹینڈر نکال کر جلد از جلد کام شروع کرا سکیں، لیکن دو ماہ گزر گئے اور ابھی تک کوئی خاطر خواہ اقدامات نہیں کیے گئے۔

ای ٹی وی بھارت نے جب وقف وکاس نگم کے ذمہ دار سے بات کی تو انہوں نے کہا کہ 'ابھی تک اس کا ٹینڈر نہیں ہو پایا، لیکن امید ہے کہ ایک دو ہفتے میں اس کا ٹینڈر ہوجائے گا اور کام بھی شروع کردیا جائے گا'۔

ای ٹی وی بھارت کو یہ بھی خبر لگی ہے کہ وقف وکاس نگم مسافر خانہ میں ایک اور منزل بنانا چاہتی ہے، جس میں بڑے ہوٹلز کی طرح ساری سہولت مہیا ہو۔

اس کے علاوہ مرمت کا کام ہونے کے بعد مسافر خانے کی بکنگ کے لیے آن لائن سسٹم کردیا جائے گا، تاکہ وہاں کے ملازمین کوئی بدعنوانی کسی مسافر کے ساتھ نہ کرپائیں۔

مسافر خانے کے ذمہ دار طارق اقبال نے بات چیت کے دوران کہ ابھی تک مسافر خانے میں کوئی تعمیری کام شروع نہیں ہوا ہے اور نہ ہی یہاں کوئی اعلیٰ افسران آئے ہوئے ہیں۔

خیال رہے کہ لکھنؤ کا مسلم مسافرخانہ چارباغ ریلوے سٹیشن اور چار باغ بس اسٹاپ کے پاس واقع ہے، یہاں پر بڑی تعداد میں مسافر آتے ہیں، لیکن سہولت کے نام پر انہیں کچھ نہیں ملتا۔