Story of Mango Man ایک ہی درخت سے تین سو سے زیادہ آم پیدا کرنے والے مینگو مین حاجی کلیم اللہ

ریاست اترپردیش کا ملیح آباد پورے ملک میں آم کی بہترین فصل کی وجہ سے جانا جاتا ہے۔ یہاں کے آم نہ صرف لذیذ و ذائقے دار ہوتے ہیں بلکہ یہاں مختلف اقسام کے آم پیدا کیے جاتے ہیں۔ ملیح آباد میں مینگو مین کے نام سے مشہور حاجی کلیم اللہ نے ایک ہی درخت سے تین سو سے زائد اقسام کے آم پیدا کرکے ایک بڑا کارنامہ انجام دیا۔

لکھنؤ: آم کا موسم اختتام پذیر ہونے کو ہے اور دنیا بھر کے لوگ آم کے ذائقے سے لطف اندوز ہو رہے ہیں۔ آپ کو یہ جان کر حیرت ہوگی کہ ایک ہی درخت میں 300 سے زائد اقسام کے آم کیسے پیدا ہوتے ہیں اور مینگو مین حاجی کلیم اللہ نے کیسے یہ سب کیسے ممکن کر دکھایا۔ ساتویں جماعت تک تعلیم یافتہ حاجی کلام کلیم اللہ کو بھارت کے معزز ایوارڈ پدم شری سے نوازا گیا ہے۔ حاجی کلیم اللہ لکھنو کے سے 30 کلومیٹر دور ملیح آباد میں رہتے ہیں جن کا ایک طویل و عریض آم کا باغ ہے۔ ملیح آباد پورے ملک میں آم کی بہترین فصل کی وجہ سے جانا جاتا ہے اور یہاں کے آم نہ صرف لذیذ و ذائقے دار ہوتے ہیں بلکہ یہاں مختلف اقسام کے آم پیدا کیے جاتے ہیں۔

ای ٹی وی بھارت نے مینگو مین حاجی کلیم اللہ سے بات چیت کی ہے جنہوں نے آم کے بارے میں تفصیل سے بتایا ہے۔ حاجی کلیم اللہ بتاتے ہیں کہ ساتویں جماعت کے بعد میں جھانسی چلا گیا اس کے بعد جب آیا تو آم کے درخت لگائے اس کے بعد 1970 میں میری شادی ہوگئی، ایک درخت تھا جس پر 33 قسم کا عام لگتے تھے لیکن جب اس کے ارد گرد پانی بھر گیا اور میں نے خشک کرنے کی کوشش کی لیکن ناکام کوشش رہی اور میں نا امید ہو گیا۔ 1991 میں اس درخت پر 33 سے زائد اقسام کے آم آئے اس وقت خوشی کے انتہا نہیں رہی اور اسی زمانے سے آموں کے اقسام پر کام کرنا شروع کیا۔

حاجی کلیم اللہ بتاتے ہیں کہ جب آم کا پھول 60 فیصد کھل جائے تو ایک پھول کو دوسرے پھول میں ملانے سے آم کی ایک نئی قسم بنتی ہے وہ کہتے ہیں کہ ہواؤں کی وجہ سے یہ پھول ایک دوسرے سے ملتے ہیں جس کے بعد یہ نئے قسم کا آم پیدا ہوتا ہے۔ حاجی کلیم اللہ نے رواں برس نئے دسہری آم کی پیداوار کی ہے۔ وہ کہتے ہیں کہ میری بڑی خواہش تھی کہ دسہری کی کوئی ایسی قسم پیدا ہو جس کی ایک جانب سرخ اور دوسرے جانب سبز ہو۔ انہوں نے کہا کہ سرخی سے اس کی قیمت میں بھی اضافہ ہوا اور اس کے ذائقے میں بھی اضافہ ہوا ہے۔ انہوں نے کہا کہ خوش قسمتی سے وہ ہمارے ہی باغ میں پیدا ہوا اور اس کا نام نیا دسہری رکھا ہے۔

حاجی کلیم اللہ بتاتے ہیں کہ آم نہ صرف ذائقے میں بلکہ خوشبو اور طبی نقطہ نظر سے بھی کافی اہم ہوتا ہے۔ انہوں نے کہا کہ آم کی مختلف شکلیں ہوتی ہیں اور اس کے مختلف طبی فائدے ہوتے ہیں حتی کہ نامرد کی مردانگی بھی واپس کرسکتا ہے۔ اس کے ساتھ اس کی خوشبو اور ذائقے بھی منفرد ہوتے ہیں۔ انہوں نے مزید بتایا کہ جب بھارتی حکومت نے پدم شری ایوارڈ سے نوازنے کا اعلان کیا تو اس وقت میری خوشی کی انتہا نہ رہی، ساتویں جماعت تک تعلیم یافتہ انسان کو پدم شری دیا جارہا تو ظاہر ہے کہ اس کے لیے خوشی کی کوئی انتہا نہیں رہے گی۔

وہ بتاتے ہیں کہ اس کے علاوہ ہم نے آم کے کئی اقسام پیدا کیے اور سیاسی پارٹیوں و سماجی رہنماؤں اور کرکٹروں اور بالی وڈ کے فلمی اداکاروں کے نام سے بھی آم پیدا کیے ہیں۔ وہ بتاتے ہیں کہ سچن تندولکر اکھلیش یادو، ایشوریا رائے، وزیراعظم نریندر مودی، اور امت شاہ کے نام سے بھی آم اگائے ہیں جو کافی ذائقے دار اور خوشبودار آم ہیں۔ انہوں نے کہا کہ ایک مرتبہ میرے باغ میں ایک خوبصورت آم پیدا ہوا تو اس وقت کی ملکہ حسن ایشوریہ رائے کے نام اس آم کا نام رکھا، اس طریقے سے جس میدان میں جن کے کارنامے اچھے ہیں اس اعتبار سے اس قسم کے آم بھی پیدا کیے ہیں، کورونا کے دور میں ڈاکٹروں اور پولیس والوں کے نام بھی آم پیدا کیے تھے۔