رامپور: لوک عدالت آج، آپسی صلح سے 11344 مقدمات کا تصفیہ کیا جائے گا

ریاست اترپردیش کے رامپور میں ڈسٹرکٹ لیگل سروسز اتھارٹی کے زیر اہتمام ضلع کی تمام تحصیلوں میں آج قومی لوک عدالت کا انعقاد کیا جائے گا۔ جہاں باہمی صلح سے 11344 مقدمات کا تصفیہ کیا جائے گا۔

رامپور کی ضلعی عدالت کے کانفرنس ہال میں میڈیا کے نمائندوں سے خطاب کرتے ہوئے ضلعی جج گورو کمار شری واستو نے بتایا کہ کورونا وبا کے دوران عدالتی کام کاج بند ہو جانے کے سبب متعدد معاملے عدالتوں میں زیر التوا ہیں۔ جس سے عدالتوں پر کام کا بوجھ بڑھتا چلا جارہا ہے

اسی کے پیش نظر چیف جسٹس آف انڈیا کے احکامات کے مطابق ملک کے تمام اضلاع کی عدالتوں میں قومی لوک عدالت کا اہتمام کیا جائے گا۔ رامپور میں بھی اس کی تیاریاں مکمل کرلی گئی ہیں۔

لوک عدالت کے فوائد بتاتے ہوئے گورو کمار شری واستو نے کہا کہ اس میں فریقین کے درمیان باہمی صلح سمجھوتے کی بنیاد پر معاملوں کو نمٹایا جاتا ہے۔

انہوں نے کہا کہ لوک عدالت میں کسی بھی قسم کی کوئی فیس نہیں لی جائے گی۔ ساتھ ہی عدالت میں زیر التوا معاملوں کا لوک عدالت میں تصفیہ ہونے پر عدالتی فیس کی واپسی کا بھی نظم رہے گا۔

آج منعقد ہونے والی لوک عدالت کو کامیاب بنانے کے لئے انتظامیہ نے پوری طاقت جھونک دی ہے۔