کانپور: فیس معاف کرنے کے لیے خون سے خط لکھا

ریاست اتر پردیش کے ضلع کانپور میں لاک ڈاؤن کے دوران اسکول کی فیس معاف کیے جانے کے لیے ونے ورما نے خون سے خط لکھ کر وزیراعلی یوگی ادتیہ ناتھ کو بھیجا ہے۔

کورونا وائرس کے پیش نظر لاک ڈاؤن کے درمیان کئی اسکول آن لائن بچوں کو پڑھا رہے ہیں۔ ایسے میں اسکول لوگوں پر دباؤ بنا رہے ہیں کہ وہ اسکول کی فیس جمع کریں۔

اسکولوں کی اس منمانی پر لوگ ایک ساتھ آئے ہیں اور لاک ڈاؤن پیرئڈ میں فیس نہ دینے کے لیے کہہ رہے ہیں۔ والدین کا کہنا ہے کہ وہ لاک ڈاؤن کے دوران مانگی جا رہی فیس نہیں دیں گے۔ اس کے لیے والدین کی قیادت کر رہے ایک تاجر رہنما نے اپنے خون سے لکھا ایک خط وزیر اعلی یوگی ادتیہ ناتھ کو بھیجا ہے۔

اس خط میں تاجر رہنما نے لکھا ہے کہ لاک ڈاؤن کی وجہ سے تاجروں اور روز کمانے اور کھانے والوں کی حالت بے حد خراب ہو گئی ہے۔ تاجر کسی طرح اپنا پیٹ کاٹ کر بچوں کو پڑھا رہے تھے، لیکن اب پیٹ بھرنا ہی مشکل ہو گیا ہے۔

انہوں نے یوگی ادتیہ ناتھ سے گزارش کی ہے کہ تین ماہ کی فیس معاف کر دی جائے۔ اتنا ہی نہیں والدین کو کتابوں کے خرچ سے بھی راحت دلائی جائے۔ اس لیے بچے پاس ہو چکے ہیں، ان کی کتابیں لے کر دیگر بچوں کو دے دی جائیں۔