اردو طلباء میں بیداری کی کمی باعث تشویش

ریاست اترپردیش کے اردو ادب، تہذیب و ثقافت کے شہر لکھنؤ میں داخلے کے لئے طلباء کا بیدار نہ ہونا، اردو زبان کے لئے تشویش کا سبب بنتا جا رہا ہے۔

لکھنؤ یونیورسٹی میں داخلے شروع ہیں، لیکن شعبہ اردو میں ابھی بھی کافی سیٹیں خالی ہیں۔

ای ٹی وی بھارت سے بات چیت کے دوران پروفیسر عباس رضا نیئر نے بتایا کہ مدارس کے طلبا کے اندر بیداری کی کمی ہے، جس کی وجہ سے طلباء نے انٹرنس کے امتحانات کے لئے آن لائن فارم نہیں بھرا تھا اور اب وہ آف لائن فارم کے لیے دباؤ ڈال رہے ہیں، جو کہ ممکن نہیں ہے۔

انہوں نے مزید کہا کہ ہمارے قوم کے طلبا انٹرنس کے امتحان دینے سے ڈرتے ہیں۔ یہی وجہ ہے کہ جہاں پر آف لائن داخلہ ہوتا ہے، وہاں پر یہ زیادہ پیسے خرچ کرتے ہیں، لیکن لکھنؤ یونیورسٹی میں آن لائن فارم نہیں بھرتے۔

پروفیسر موصوف نے کہا کہ ہم نے کافی کوششیں کیں کہ یہاں پر ایک بھی سیٹ خالی نہ رہے، لیکن اردو شعبہ کے بی اے میں 80 سیٹ پر 58 کا داخلہ اور ایم اے اردو میں 130 سیٹ پر 95 طلباء کا داخلہ ہو پایا۔

شعبہ اردو میں کافی سیٹیں اب بھی خالی ہیں، لیکن اب وہاں پر کسی بھی طالب علم کا داخلہ نہیں ہو سکتا، کیونکہ زیادہ تر طلباء نے آن لائن رجسٹریشن نہیں کرایا ہے۔

ایسے میں سوال یہ ہے کہ اردو زبان کیسےفروغ پایئگی، جب اردو پڑھنے والے طلباء بیدار ہی نہیں ہیں۔