مئو: مزدور کی ٹرین کی زد میں آنے سے موت

مئو ضلع کے گودھنا موضع کے باشندے رام آشرے یادو کی ٹرین کی زد میں آنے سے موت ہو گئی ہے، لیکن ان کی موت کے کئی روز کے بعد بھی اب تک کوئی سرکاری افسر ان کے اہل خانہ سے ملا نہیں ہے۔

ریاست اترپردیش کے مئو ضلع کے گودھنا موضع کے باشندے راماشرے یادو گجرات کے راجکوٹ ضلع میں ایک اسٹیل فیکٹری میں مزدوری کرتے تھے۔

لاک ڈاؤن کا اعلان ہوتے ہی فیکٹری بند ہو گئی اور تمام مزدور بے روزگار ہو گئے۔ راماشرے نے لاک ڈاؤن کے پہلے اور دوسرے مرحلے تک تو برداشت کیا، لیکن تیسرے مرحلے میں راماشرے کا صبر جواب دے گیا۔ وہ کسی بھی صورت میں اپنے آبائی وطن واپس جانا چاہتے تھے۔

راماشرے یادو کی ٹرین کی زد میں آنے سے موت

راجکوٹ اسٹیشن پہنچنے سے پہلے ہی کسی ٹرین کی زد میں آکر راماشرے کی موت ہوگئی۔ راماشرے کے گھر مئو ضلع کے گودھنا موضع میں خبر پہنچتے ہی پورا خاندان غم میں ڈوب گیا۔

راماشرے کی بیوی، ماں اور دونوں بچے اس صدمے سے نڈھال ہو گئے ہیں۔ مالی طور پر معذور راماشرے کے بیوی بچے بے حد بوسیدہ مکان میں رہائش پذیر ہیں۔

اس حادثہ کو کئی روز گزرنے کے باوجود کوئی سرکاری افسر اس غریب خاندان کا غم بانٹنے نہیں آیا ہے۔

گودھنا موضع کے پردھان کا کہنا ہے کہ وہ راماشرے کے اہل خانہ کی ہر ممکن مدد کریں گے۔ مئو شہر سے تقریباً 35 کلومیٹر کی مسافت پر واقع گودھنا موضع میں کوئی پکی سڑک نہیں ہے۔