بجلی کی بڑھتی قیمتوں کے خلاف کسانوں کا شدید احتجاج

ریاست اترپردیش میں قومی قیادت کی ہدایت پر 'بھارتیہ کسان یونین غیر سیاسی ٹکیت گُٹ' کے کارکنان نے بجلی کی قیمتوں میں ہوئے اضافے کے خلاف احتجاج کیا۔

کسانوں نے شہر کے مختلف علاقوں سے ریلی نکالی اور ایس ڈی ایم دفتر کو گھیر لیا، میمورنڈم دینے کے بعد کسان واپس لوٹ گئے۔

قابل ذکر ہے کہ اترپردیش حکومت نے دیہی علاقوں کی بجلی کی قیمتوں میں 25 فیصد کا اضافہ کیا ہے۔

یہاں بتاتے چلیں کہ ٹکیت گُٹ دراصل معروف کسان رہنما مہیندر سنگھ ٹکیت کے نام پر بنائی گئی کسانوں کی تنظیم ہے۔

کسانوں کا کہنا ہے کہ بجلی کی قیمت بڑھنے سے کسانوں کو کافی نقصان ہوگا کیوں کہ کسان 1500 روپئے ہر ماہ بل ادا نہیں کر سکتے۔ اس لئے اضافی قیمتوں کو جلد از جلد واپس لینا چاہئے۔

کسانوں نے انتباہ کیا ہے کہ اگر قیمتوں میں ترمیم نہیں کی گئیں تو بڑے پیمانے پر احتجاج کیا جائے گا۔