نوئیڈا: صحافیوں کا گورنر کے نام ڈی ایم کو میمورنڈم

نوئیڈا اور گریٹر نوئیڈا کے صحافیوں نے میڈیا گروپس بھاسکر اور بھارت سماچار کے دفاتر اور مالکان کے گھروں پر آئی ٹی چھاپے کے حوالے سے گورنر کے نام ڈی ایم کو میمورنڈم پیش کیا۔

اتر پردیش کے نوئیڈا میں سینکڑوں صحافیوں نے ڈی ایم سہاس ایل وائی کو گورنر کے نام میمورنڈم دیا۔ میڈیا ہاؤس پر کارروائی پر صحافیوں میں غم و غصہ پایا جا رہا ہے۔

اس دوران صحافیوں نے نعرہ لگایا اور اپنا احتجاج درج کرایا۔ صحافیوں کا کہنا تھا کہ حکومت کچھ بھی کر سکتی ہے لیکن وہ ہمارے قلم اور آواز کو دبا نہیں سکتی، ہم سچ کے ساتھ ہیں اور سچ دکھائیں گے، کسی سے خوفزدہ نہیں ہوں گے۔

صحافیوں نے کہا کہ ہم نا انصافی کے خلاف مضبوطی سے لڑیں گے۔ اس دوران صافی دانش عزیز نے کہا کہ ہمارا کام سچائی کو سامنے لانا ہے ہم کسی کے خلاف بغض نہیں رکھتے۔ انہوں نے کہا کہ آئی ٹی کی چھاپے ماری صحافت کی آزادی پر حملہ ہے۔

انہوں نے کہا کہ ہم نے میمورنڈم میں میں گورنر سے یہ مطالبہ کیا ہے کہ اس کی آزادانہ طور پر جانچ بھی کرائی جائے۔

ان کا کہنا ہے کہ اگر کسی کو کوئی شکایت تھی تو براہ راست بات کر سکتا تھا لیکن ایجنسیوں کا استعمال کرکے سچائی کو دبانے کی کوشش کی جارہی ہے، جو سراسر غلط ہے اور وہ اپنے منطقی انجام کو نہیں پہنچے گی۔

اس دوران شیو تیاگی ،ندیم سیفی، اکرم چودھری ،محمد عمران ،اقبال چودھری دانش عزیز کے علاوہ کئی صحافی موجود تھے۔