جونپور: بجلی کی زد میں آکر تین بچے جھلس گئے، ایک کی موت

دو بچوں کو ضلع اسپتال میں داخل کیا گیا، جہاں ابتدائی علاج کے بعد نازک حالت کو دیکھتے ہوئے انھیں وارانسی منتقل کردیا گیا۔

اتر پردیش کے ضلع جونپور کے مچھلی شہر تھانہ حلقہ کے موضع کوراہاں میں ہائی ٹینشن تار کی زد میں آنے سے ایک ہی گھر کے تین بچے شدید طور پر جھلس گئے، جس میں موقع پر ہی ایک بچے کی موت ہوگئی۔

دو بچوں کو شدید حالت میں ضلع اسپتال لایا گیا جہاں ابتدائی علاج کے بعد ان کی نازک حالت کو دیکھتے ہوئے انھیں وارانسی منتقل کردیا گیا۔

ضلع اسپتال کے ڈاکٹر نے بتایا کہ دونوں بچے 90 سے 95 فیصدی جلے ہوئے ہیں جن کی حالت بیحد نازک بنی ہوئی ہے جنہیں بہتر علاج کے لیے وارانسی ریفر کیا گیا ہے۔ جس میں ایک بچے کی موت ہوگئی۔

موضع کوراہاں میں بھجن لال گپتا کے مکان سے بجلی کے 11000 بولٹ کی تار بالکل قریب سے گئی ہوئی ہے، جس کی درستگی کے لیے محکمہ کے اعلیٰ افسران کو تحریری درخواست بھی دی گئی تھی، مگر محکمہ نے نوٹس نہیں لیا، جس کی وجہ سے آج ایک بڑا حادثہ پیش آگیا۔

محکمہ کی لاپرواہی کی نذر ہوئے تین معصوم بچے چھت پر کھیل رہے تھے جس وقت یہ واقعہ پیش آیا۔