ریاست اترپردیش کے ضلع امروہہ کے قصبہ سید ناگلی میں محکمہ صحت کو جعلی ڈاکٹروں کے ذریعہ ہسپتال کھول کر مریضوں کے علاج کے بارے میں مسلسل اطلاع حاصل ہو رہی تھی۔
جس کے بعد محکمہ صحت کے نوڈل آفیسر سریندر کمار نے ٹیم کے ہمراہ قصبہ سید ناگلی میں چھاپہ مارا اور بہت سے جعلی ڈاکٹروں پر کارروائی کی۔
چھاپے کی اطلاع ملتے ہی جعلی ڈاکٹروں میں ہلچل مچ گئی اور بہت سارے، ڈگری نہ رکھنے والے ڈاکٹر اپنے ہسپتال اور مریضوں کو چھوڑ کر فرار ہوگئے۔
امروہہ ضلع کے نوڈل آفیسر سریندر کمار نے بتایا کہ انہیں اطلاع ملی تھی کہ بہت سارے افراد ڈگریوں کے بغیر جعلی ڈاکٹر بنا کر مریضوں کا علاج کر رہے ہیں۔ اطلاع کی بنیاد پر سید ناگلی میں چھاپے مارے اور دو جعلی کلینک سیل کرنے کے ساتھ دو جعلی کلینک کو بھی نوٹس دیا گیا ہے۔ انہوں نے کہا کہ یہ مہم جاری رہے گی۔
