رام پور میں دفعہ 144 نافذ

جوہر یونیورسٹی کے معاملے پر گھمسان جاری ہے،سماجوادی پارٹی کارکنان کے مظاہرے اور کشیدگی کو دیکھتے ہوئے انتظامیہ نے رام پور میں دفعہ 144 نافذ کر دی ہے۔

رکن پارلیمان اعظم خان اور ان کے بیٹے عبداللہ کے خلاف مسلسل جانچ کے بعد سماجوادی پارٹی کے صدر و سابق وزیر اعلیٰ اتر پردیش اکھیلش یادو کے حکم پر آج صبح 10 بجے بریلی، پیلی بھیت، سنبھل، بدایوں، امروہہ، مرادآباد اور بجنور کے سماجوادی لیڈران، کارکنان اور پارٹی عہدیداران رام پور پہنچ رہے تھے۔

پولیس انتظامیہ کو جب اس کی خبر ہوئی تو سارے راستوں کو بند کر دیا اور دفعہ 144 نافذ کردیا۔ ساتھ ہی رام پور میں آج داخل ہوئی سبھی گاڑیوں کی جانچ نام پتے کے ساتھ ہو رہی ہے۔

ضلع مجسٹریٹ آنجنے کمار نے بتایا کہ عیدالاضحی قریب ہے اور کانوڑ یاترا بھی جاری ہے، کوئی بڑی واردات نہ ہو اس لیے ہمیں یہ قدم اٹھانا پڑا۔