فرخ آباد: سبھاش باتھم کی بیٹی کو آئی جی گود لیں گے

ریاست اترپردیش کے ضلع فرخ آباد میں پولیس نے 23 بچوں کو قید کرنے والے مجرم سبھاش باتھم کو ہلاک کر دیا تھا، اس کی ایک برس کی بیٹی گوری کو کانپور کے آئی جی گود لیں گے۔

فرخ آباد میں گزشتہ دنوں اپنے کچھ مطالبات کے لیے انتظامیہ پر دباؤ بنانے کے مقصد سے اپنی بیٹی کی سالگرہ کے بہانے سبھاش باتھم نے گاؤں کے 23 چھوٹے بچوں کو یرغمال بنالیا تھا۔ اس نے بچوں کو اپنی قید سے رہا کرنے کے عوض میں فی بچہ ایک کروڑ روپے کے حساب سے 23 کروڑ روپے کا مطالبہ کیا تھا۔
پولیس کے انکاؤنٹر میں سبھاش ہلاک ہوگیا جبکہ گاؤں والوں نے اس کی بیوی روبی کو پتھر سے مار ما رکر ہلاک کردیا۔

جس کے بعد اب کانپور کے آئی جی موہت اگروال نے اس کی بیٹی کو گود لینے کا فیصلہ کیا ہے، فی الحال گوری باتھم کی دیکھ بھال کانسٹیبل رجنی کررہی ہیں۔

نمائندہ ای ٹی وی بھارت سے فون پر گفتگو کرتے ہوئے آئی جی موہت اگروال نے بتایا کہ 'بیٹی کی ٹھیک سے دیکھ بھال ہو، پرورش اور پڑھائی اچھی ہو، اس کے لیے انہوں نے گوری کو گود لینے کا فیصلہ کیا ہے۔'

ان کی خواہش ہے کہ گوری آئی پی ایس بنیں اور سماج کی خدمت کریں۔

انہوں نے بتایا کہ وہ جلد ہی قانونی عمل کو پورا کرکے گوری کو گود لیں گے۔