Roof Collapsed in Muzaffarnagar مظفرنگر میں چھت گرنے سے دو لوگوں کی موت

مظفر نگر میں موسلا دھار بارش کی وجہ سے کچّی چھت گرنے سے ایک ہی خاندان کے پانچ افراد ملبے تلے دب گئے۔ حادثے میں دو بچوں کی موت ہو گئی، جب کہ ایک بچی سمیت 3 افراد زخمی ہو گئے۔ گاؤں والوں نے بمشکل ملبے تلے دبے لوگوں کو باہر نکالا۔ زخمیوں کو ضلع اسپتال میں داخل کرایا گیا ہے۔

مظفر نگر: ریاست اترپردیش کے مظفرنگر ضلع کے نئی منڈی کوتوالی علاقے میں آج صبح سویرے میں اس وقت ایک دلدوز واقعہ پیش آیا جب موسلا دھار بارش کے دوران مکان کی کچی چھت منہدم ہوگئی جس کے ملبے میں دب کر دو بچوں کی موت ہوگئی جب کہ دیگر تین لوگ شدید طور پر زخمی ہوگئے۔

ذرائع کے مطابق دیر رات موسلادھار بارش کے سبب 50 سالہ ادریش کے کچے مکان کی چھت گر گئی۔ گھر میں سوئے ہوئے ادریش سمیت خاندان کے پانچ افراد ملبے میں دب گئے۔ حادثے کی اطلاع ملتے ہی گاؤں والے مدد کے لیے پہنچ گئے۔ کافی کوشش کے بعد ملبے میں دبے لوگوں کو باہر نکالا گیا۔ سبھی کو ضلع اسپتال لے جایا گیا۔

ہسپتال ذرائع کے مطابق ادریش کا 13سالہ بیٹا اویس اور ادریس کا سالا 15سالہ ارسلان ولد افسر سکنہ بکھر نگر مکان کے ملبے تلے دب کر دم توڑ گئے۔ جبکہ ادریش اور اس کی 12 سالہ بیٹی کریم اور 17 سالہ بیٹا سمیر زیر علاج ہیں۔ مرنے والوں میں اویس ولد ادریس ایس ڈی انٹر کالج کا نویں جماعت کا طالب علم تھا۔ جبکہ مقتول ارسلان ولد افسر زخمی ادریش کا سالا معلوم ہوتا ہے۔ وہ بکھر نگر کا رہنے والا ہے۔ ایس ڈی ایم صدر پرمانند جھا نے بتایا کہ حادثے میں دو بچوں کی موت کی تصدیق ہو گئی ہے۔ انہوں نے کہا کہ بچاؤ اور راحت کا کام جاری ہے۔