شاعر عاقل جونپوری کی پہلی برسی پر ایک پروگرام کا انعقاد

عاقل جونپوری کا اچانک دنیا سے رخصت ہونا سماجی اور ادبی دونوں شعبوں میں نقصان کا باعث ہے جس کی تلافی ممکن نہیں۔

اتر پردیش کے ضلع جونپور میں مشہور شاعر و صحافی عاقل جونپوری کی پہلی برسی کے موقع پر مائنارٹی ویلفئر سوسائٹی کے زیرِ اہتمام شہر کے محلہ خواجگی ٹولہ میں شاعر قاری اشتیاق احمد ضیاء جونپوری کی صدارت میں ایک پروگرام کا انعقاد کیا گیا جس کی نظامت شہزاد جونپوری نے کی۔

مائنارٹی ویلفئر سوسائٹی کے صدر حفیظ شاہ نے کہا کہ 'عاقل جونپوری کا اچانک دنیا سے رخصت ہونا سماجی اور ادبی دونوں شعبوں میں نقصان کا باعث ہے جس کی تلافی ممکن نہیں۔

وہیں قاری اشتیاق احمد ضیاء جونپوری نے اپنے صدارتی خطبہ میں کہا کہ عاقل جونپوری کے ساتھ ہمارا رشتہ بہت پرانا تھا ہم لوگ اکثر پروگراموں میں ایک ساتھ جایا کرتے تھے لیکن رب کی مرضی سے آگے کوئی نہیں جاسکتا۔

ثاقب احمد نے کہا کہ عاقل جونپوری سے ہمارا ذاتی تعلق تھا ان کی بے وقت چلے جانا شاعری کی دنیا کے ساتھ ساتھ میرا ذاتی بھی نقصان ہے۔

اس موقع پر شعرائے کرام نے اپنی شاعری کے ذریعے مرحوم شاعر عاقل جونپوری کو خراجِ عقیدت بھی پیش کیا جس کے چند منتخب اشعار پیشِ خدمت ہیں۔

• ہمارے شہر کا منظر خرید لوگے کیا
  امیر ہو تو سمندر خرید لوگے کیا
  

شاعر۔ اسیم مچھلی شہری

• کم نظر جب سے اہل نظر ہو گئے
  عیب جتنے تھے سارے ہنر ہو گئے
  

شاعر۔ اکرم جونپوری

• اسی کا خلد میں ہوگا گزارا یا رسول اللّٰہ
  ملا ہے آپ کا سہارا جس کو یا رسول اللّٰہ
  

شاعر۔ قاری ضیاء جونپوری

• تیرا وعدہ تھا ساتھ چلنے کا
  کیا سبب تھا راستہ بدلنے کا
  

شاعر۔ مونس جونپوری

اس موقع پر ڈاکٹر عرشی، محمد عاصم، معراج احمد، شاد، حذیفہ انصاری، شوبی تاج، اکرم انصاری بیگ، صلاح الدین کے علاوہ دیگر لوگوں نے شرکت کی اور اپنے خیالات کا اظہار کیا۔