پریاگ راج:شاہی عیدگاہ تنازعہ کی سماعت صرف متھرا کے سول جج کی عدالت میں ہوگی۔ یوپی سنی سنٹرل وقف بورڈ اور ٹرسٹ شاہی مسجد عیدگاہ کی نظرثانی کی درخواستوں پر ہائی کورٹ نے کیس کو واپس سول جج متھرا کی عدالت میں بھیج دیا ہے۔ عدالت نے سول جج کو سیول پروسیجر کوڈ کی دفعات پر عمل کرنے اور متھرا شاہی عیدگاہ کے فریقین کی طرف سے دائر سول سوٹ کی سماعت کرنے کی ہدایت دی ہے۔ جسٹس پرکاش پاڈیا نے سنی سنٹرل بورڈ اور شاہی مسجد عیدگاہ کی درخواستوں پر سماعت کی۔
نظرثانی کی درخواست میں 19 مئی 2022 کو ڈسٹرکٹ جج متھرا کے ذریعے دیے گئے حکم کو چیلنج کیا گیا تھا، جس میں ڈسٹرکٹ جج نے 30 ستمبر 2020 کو کرشنا جنم بھومی پکشا کی جانب سے دائر سول سوٹ کو سننے سے انکار کرتے ہوئے سول جج متھرا کے حکم کو منسوخ کر دیا تھا۔ کرشنا جنم بھومی متھرا کی جانب سے دیوانی مقدمہ دائر کرتے ہوئے کٹرا کیشو دیو میں واقع 13.37 ایکڑ اراضی پر اپنے حق کا دعویٰ کیا۔ انہوں نے دعوی کیا کہ یہ کرشن کی جائے پیدائش ہے۔ سول سوٹ میں یہ بھی مطالبہ کیا گیا کہ اس جگہ پر بنائے گئے ڈھانچے کو ہٹایا جائے۔ اس کے علاوہ 20 جولائی 1973 اور 7 اپریل 1974 کے معاہدے کو منسوخ کیا جائے اور دوسرے فریق کو اس 13.37 ایکڑ اراضی میں داخلے سے روکا جائے۔
سول جج نے اس کیس کو سول سوٹ کے طور پر درج کرنے کے بجائے متفرق مقدمہ کے طور پر دائر کیا اور بعد میں اسے یہ کہتے ہوئے خارج کر دیا کہ کرشن جنم بھومی پکشا کے لوگ کرشن کے پوجا کرنے والے ہیں۔ پوری دنیا میں کروڑوں پوجا کرنے والے ہیں اور اگر ہر کسی کو دیوانی مقدمہ دائر کرنے کی آزادی دی جائے تو عدالتی اور سماجی نظام درہم برہم ہو جائے گا۔ سول جج نے یہ بھی کہا کہ درخواست گزار کو یہ مقدمہ دائر کرنے کا کوئی حق نہیں ہے۔