نیپال سے منسلک سرحد پر ہائی الرٹ

اتر پردیش میں پولیس نے آٹھ پولیس اہلکار کے قتل کے کلیدی ملزم وکاس دوبے کی گرفتاری کے لیے نیپال سے منسلک بین الاقوامی سرحد پر ہائی الرٹ جاری کیا ہے۔

کانپور میں پولیس سرکل افسر سمیت آٹھ پولیس اہلکار کے قتل کا کلیدی ملزم وکاس دوبے کی گرفتاری کے لئے پولیس نے اترپردیش کے مہاراج گنج، سدھارتھ نگر، بلرامپور، شرواستی، بہرائچ، لکھیم پور کھیر اور پیلی بھیت اضلاع کے ساتھ ساتھ ملک نیپال سے منسلک 550 کلو میٹر لمبی بین الاقوامی سرحد پر ہائی الرٹ جاری کرتے ہوئے چوکسی بڑھا دی ہے۔

سرکاری ذرائع نے بتایا 'وکاس دوبے گرفتاری سے بچنے کے لئے نیپال فرار ہوسکتا ہے۔ جس کے پیش نظر ان اضلاع میں وکاس دوبے کے پوسٹر لگائے گئے ہیں اور پولیس جگہ جگہ تلاشی لے رہی ہے۔ سبھی مقامی تھانوں کو وکاس دوبے کی فوٹو بھی دستیاب کرائی گئی ہے'۔

ذرائع نے بتایا 'وکاس دوبے کی گرفتاری کے لئے بین الاقوامی سرحد کے لئے تعینات مسلح بارڈ فوج کو بھی مستعد کردیا گیا ہے۔ سرحد پر لگاتار گشت جاری ہے۔

واضح رہے کہ کچھ روز قبل یو پی پولیس وکاس دوبے کو گرفتار کرنے کے لیے اس کی رہائش گاہ پر گئی تھی، راستے میں وکاس دوبے کے غنڈوں نے پولیس پر گولیاں چلائی، جس سے آٹھ پولیس اہلکار ہلاک ہو گئے۔

وہیں اس دوران پولیس کی جانب سے بھی جوابی فائرنگ کی گئی تھی، نتیجے میں دو مجرم ہلاک ہوئے۔