شمالی ہندوستان میں ٹھنڈی ہواؤں اور کہرے سے کسانوں کو بھاری نقصان

Cold Winds and Fog in North India مرادآباد میں پالے یعنی کہرے سے سبزیوں کی فصل متاثر ہو رہی ہے، اس کو لے کر کسان پریشان ہیں۔ حالانکہ سردی کے موسم میں کسان اپنی فصل کو بچانے کے لئے ہر ممکن کوشش کرتے ہیں، مگر پھر بھی کہرے کی مار سے اپنی فصل کو نہیں بچا پاتے۔

مرادآباد: شمالی ہندوستان میں سرد لہروں اور پالے یعنی کہرے کا ستم بدستور جاری ہے۔ جہاں ایک طرف سرد لہروں اور کہرے نے لوگوں کا جینا محال کر رکھا ہے تو وہیں دوسری طرف سبزیاں اور گیہوں بھی پالے اور سرد لہر سے متاثر ہو رہی ہیں۔
اس معاملے پر جب ہم نے مرادآباد کے رام گنگا ندی پار کسانوں سے بات کی تو انہوں نے اپنی پریشانیاں بیان کی۔

کسانوں کے مطابق پالے اور سردی کی لہر سے سبزیوں کو بھاری نقصان ہو رہا ہے۔ رات کو ٹھنڈ پڑنے سے بوئی گئی سبزیوں پر برا اثر پڑتا ہے اور ان کے پودے مر جاتے ہیں۔ کسانوں نے بتایا کہ سب سے زیادہ نقصان سبزیوں کو ہو رہا ہے جہاں ہم پرال کی باڑ باندھ کر کسی طرح فصلوں کو بچانے کی کوشش کی جا رہی ہے۔

کسان رمیش نے بات کرتے ہوۓ کہا کہ وہ تقریباً تین بیگھا زمین پر کھیتی کرتا ہے، جس میں سے کچھ میں اس نے گیہوں بو رکھے ہیں اور دو بیگھا میں تورئی کی فصل بوئی ہے۔ مگر ٹھنڈ کے باعث فصلیں بری طرح متاثر ہو رہی ہیں۔ رات کو پالا پڑنے سے سبزیوں کے پودے بڑھ نہیں پا رہے ہیں اور ان کے پودے مر رہے ہیں۔

انہوں نے بتایا کہ تورئی کے ساتھ دیگر سبزیوں بالخصوص مولی کی فصل کو بھی بھاری نقصان ہو رہا ہے۔ رمیش کے ساتھ ہی دوسرے کسانوں نے بھی کہا کہ اس طرح فصل کو بچانے میں لاگت بڑھ جاتی ہے۔ فصل کو بچانے کے لیے وہ پرال کا انتظام کرتے ہیں اس کے علاوہ دوائیاں بھی ڈالتے ہیں۔ وه مزید بتاتے ہیں کہ حکومت کی جانب سے بھی ان کو اس کا کوئی معاوضہ نہیں مل پاتا ہے۔

کسانوں نے کہا کہ اُنہوں نے فصل کو ٹھنڈ سے بچانے کے لیے بازار سے پرال خرید کر تورئی کی فصل کے چاروں طرف باڑ باندھی ہے۔ پرال کی یہ باڑ تورئی کی فصل کو کہرے کی مار سے بچانے کے لیے لحاف گدے کا کام کرتی ہے۔ اس کے علاوہ انہوں نے یہ بھی بتایا کہ اس طرح لاگت بڑھ جاتی ہے اور بالآخر ہم کو نقصان اٹھانا پڑتا ہے۔